“Крокус”даги теракт жабрланувчилари Агаларовларнинг мол-мулкини тортиб олишни талаб қилди

north_east

“Ҳимматингдан айнанай, халқим”. Чорвоқ Агаларовларга арзонга берилгани изоҳланди

Москва яқинидаги “Крокус Сити Холл” концерт залида содир этилган терактда жабрланганларнинг адвокатлари Тергов қўмитасига Араз ва Эмин Агаларовларнинг мол-мулкини тортиб олиш тўғрисида илтимоснома киритди. Бу ҳақда РБК'га қурбонлар вакилларидан бири Игорь Трунов хабар берди.

Адвокатнинг сўзларига кўра, даъво Crocus Group эгаларига тегишли бўлган мулкка тегишли: “Крокус” АЖ, “Крокус профи” хусусий қўриқлаш компанияси ва “Crocus International” ОАЖ.

Труновнинг таъкидлашича, “Крокус” АЖ террорчилик ҳужуми содир бўлган залдаги ёнғин ўчириш тизимлари ва авариядан чиқиш йўллари учун жавобгардир. Тадбир Crocus Group томонидан ташкил этилган бўлиб, хавфсизликни “Crocus Profi” хусусий қўриқлаш компанияси таъминлаган.

“Биз кўчмас мулк ва у билан тузилган битимларнинг ягона давлат реэстридан қандай мулк қолганини аниқлаш учун маълумотларни сўраяпмиз. Ҳозирда фаол сотувлар олиб борилмоқда, чет элга пул ўтказилмоқда”, деган Трунов.

Унинг аниқлик киритишича, ариза иккита жиноий ишдан бири бўйича берилган: биринчиси аллақачон судга юборилган, иккинчиси эса Тергов қўмитаси томонидан текширилмоқда.

“Крокус”даги теракт 2024 йилнинг 22 март куни кечқурун содир бўлган. Ҳужумчилар бинога бостириб кириб, ўт очган, кейин эса бинони ёқиб юборган. Ҳужум оқибатида 149 киши ҳалок бўлди, бир киши бедарак йўқолди, 609 киши яраланди.

Эртаси куни Украина чегарасидан 100 км узоқликда жойлашган Брянск вилоятида тўрт террорчи қўлга олинди. Тергов давомида улар ҳужумни Украина разведка хизматлари уюштирганини тан олган. Ташкилотчилар қидирувга берилган.

Март ойида Crocus Group эгаси Агаларов “Крокус Сити Ҳолл” хавфсизлик хизмати пулемётлар билан қуролланган террорчиларга қарши ожиз эканини айтганди.

Эслатиб ўтамиз, аввалроқ Москва шаҳридаги Иккинчи Ғарбий округ ҳарбий суди Москва яқинидаги “Крокус Сити Ҳолл” концерт залида содир этилган теракт бўйича жиноий ишнинг мазмун-моҳиятини кўриб чиқишни бошлагани хабар қилинганди. Прокурор айблов хулосасини ўқиб эшиттиргач, терактни содир этган тўрт нафар гумонланувчидан уч нафари ўз айбларига тўлиқ, яна бири қисман иқрор бўлди.