Ким АҚШ КХДР билан мулоқот қилиши учун нимадан воз кечиши кераклигини айтди

Шимолий Корея етакчиси Ким Чен Ин агар Вашингтон “денуклеаризацияга бўлган иштиёқ”дан воз кечса, АҚШ билан мулоқотга ҳеч қандай тўсиқ кўрмаслигини айтди. Бу ҳақда у кеча, 21 сентябрь куни КХДР Олий халқ ассамблеясининг йиғилишида сўз очди.  

Унинг таъкидлашича, Пхеньян ҳеч қачон ўз ядровий арсеналини санкцияларни бекор қилиш учун алмаштирмайди. Унинг сўзларига кўра, санкциялар “сабоқ” бўлиб, мамлакатни янада кучлироқ ва мустаҳкамроқ қилган.

Бу баёнотлар Жанубий Кореянинг янги либерал ҳукумати Дональд Трампни Пхеньян билан мулоқотни қайта тиклаш бўйича саъй-ҳаракатларга раҳбарлик қилишга чақирган чоғида янграмоқда. Тинчлик музокаралари олти йил аввал санкциялар ва ядровий қуролсизланиш бўйича келишмовчиликлар туфайли тўхтаб қолган эди.

Июнь ойида лавозимга киришган Жанубий Корея президенти Ли Чжэ Мён тинчлик ташаббусларини фаол илгари сурди ва Пхеньян билан мулоқот зарурлигини таъкидлади. У ишончни мустаҳкамлаш ва Шимолий Кореянинг ядровий дастурини босқичма-босқич йўқ қилиш бўйича чоралар кўришни таклиф қилди ва Трамп бу саъй-ҳаракатларда асосий роль ўйнаши мумкинлигини таъкидлади.

Ким Вашингтон ва Сеулнинг мулоқотга бўлган сўнгги чақириқларини носамимий деб атади ва уларнинг асосий мақсади – Шимолий Кореяни заифлаштириш ва унинг режимини йўқ қилиш ўзгаришсиз қолаётганини таъкидлади.

Шу билан бирга, Шимолий Корея етакчиси биринчи президентлик даврида уч марта учрашган Дональд Трамп ҳақида “илиқ хотиралар” билдирди.

Халқаро санкциялар ва БМТ Хавфсизлик Кенгаши резолюцияларига қарамай, Шимолий Корея ядро қуроли ва илғор баллистик ракеталарни ишлаб чиқишда муваффақият қозонишда давом этмоқда. Жанубий Корея Президентининг сўзларига кўра, санкциялар Пхеньянни тўхтата олмади ва Ким Чен Ин ҳар йили ўз арсеналига 15-20 та ядро каллакларини қўшиб бормоқда.

“Ҳақиқат шундаки, санкциялар ва босимга асосланган аввалги ёндашув муаммони ҳал қилмади. Бу вазиятни янада оғирлаштирди”, деган Ли Чжэ Мён.

Июль ойида Шимолий Корея етакчисининг синглиси Ким Ё Чжон Дональд Трампнинг Шимолий Кореяни ядросизлантиришга уринишларини очиқчасига масхара қилган эди. Сентябрь ойида Шимолий Корея Қўшма Штатларнинг ядровий қуролдан воз кечиш ҳақидаги чақириғини қатъиян рад этди. КХДР ўзининг характерли риторикасидан фойдаланиб, ўзининг ядровий мақомини “қайтариб бўлмайдиган” ва денуклеаризация бўйича ҳар қандай талабларни “ички ишларига провокацион аралашув” деб атади.

Эслатиб ўтамиз, аввалроқ Шимолий Корея етакчиси Ким Чен Ин Пхеньяндаги Мудофаа институтларига ташриф буюриб, энг янги ҳарбий технологиялар, жумладан, зирҳли ва фаол мудофаа тизимларининг ривожланиши билан танишганди. Шунингдек, у Шимолий Корея учувчисиз учиш аппаратлари уюшмаси илмий-тадқиқот институтлари ва корхоналарида ишлаб чиқилган дронларни синовдан ўтказганида шахсан ўзи қатнашганди.