Кремль Трампнинг “фитна” ҳақидаги сўзларига жавоб берди (видео)

Россия Президенти ёрдамчиси Юрий Ушаковнинг айтишича, АҚШ Президенти Дональд Трампнинг Россия, Хитой ва Шимолий Корея етакчилари АҚШга қарши фитна уюштираётгани ҳақидаги сўзлари кинояли ва кулгулидир. Бу ҳақда у бугун, 3 сентябрь куни журналист Павел Зарубинга берган интервьюсида сўз очди.

Путиннинг ёрдамчисига кўра, Трампнинг бу гапларини ҳазилга йўйиш керак, чунки учрашувларда фитна ҳақида ҳеч қандай гап-сўз бўлмаган. 

“У буни хазиллашиб айтган, гўёки учала етакчи АҚШга қарши фитна тайёрлаётгандек. Ҳеч қандай фитна бўлмади, ҳеч ким ҳеч нарса уюштирмади. Уларнинг учаласида ҳам бундай фикр йўқ”, деган Ушаков. 

Шунингдек, Кремль вакили халқаро муносабатларда Трампнинг улуши катталиги, кўплаб давлатлар билан алоқа қилишда у муҳим роль ўйнашини айтган. 

Дональд Трамп фитна ҳақидаги сўзларни Truth Social’да, Иккинчи жаҳон урушининг тугаши ва Япония капитуляциясининг 80 йиллиги муносабати билан Пекинда ўтказилган ҳарбий параддан кейин ёзди. У ўз постида Хитой Раиси Си Цзиньпинга мурожаат қилиб, ундан: “Учовлон АҚШга қарши фитна уюштираётган бир пайтда, Россия Президенти Владимир Путин ва КХДР раҳбари Ким Чен Инга энг илиқ тилакларини етказишни” сўраган.

Бироқ Трамп аввалроқ интервьюларининг бирида Хитой ва Россиянинг АҚШга қарши “ўқ узиши”дан хавотирда эмаслиги, ушбу давлатлар ҳеч қачон АҚШга қарши қуролли куч ишлатмаслигига ишонишини билдирган.

Маълумот учун, ШҲТ саммитдан сўнг, бугун, 3 сентябрь куни Пекин шаҳрининг Тяньаньмэнь майдонида Иккинчи жаҳон урушидаги Ғалабанинг 80 йиллигига бағишланган тантанали тадбирлар бўлиб ўтди. Парадда Ўзбекистон Президенти Шавкат Мирзиёев ҳам рафиқаси билан қатнашди. Шунингдек, унда Хитой раҳбари Си Цзиньпин, Россия Президенти Владимир Путин, Шимолий Корея етакчиси Ким Чен Ин ва яна 24 давлатнинг давлат ва ҳукумат раҳбарлари иштирок этди.