Трамп Украинага Хитой қўшинларини киритишни таклиф қилди

АҚШ Президенти Дональд Трамп уруш тугаганидан кейин Украинага тинчликпарвар куч сифатида Хитой қўшинларини киритиш зарур деб ҳисоблайди. Бу ҳақда кеча, 29 август куни муҳокамалар ҳақида маълумот берган тўрт кишига таяниб, “Financial Times” нашри хабар берди.

Таъкидланишича, Трамп шу тариқа Россия Президенти Владимир Путиннинг таклифини қўллаб-қувватлаган. Газетанинг суҳбатдошларига кўра, 18 август куни Оқ уйда Украина Президенти Владимир Зеленский ва Европа етакчилари билан учрашувда Трамп Хитойдан Россия билан тинчлик келишуви доирасида 1300 километрлик фронт чизиғи бўйлаб нейтрал ҳудудни кузатиш учун тинчликпарвар кучларни тақдим этишни сўрашни таклиф қилган.

Бироқ Оқ уй бундай фикр муҳокама қилинганини рад этади.

“Бу ёлғон”, деган Трамп маъмуриятининг юқори мартабали вакили FT'га.

Газетанинг қайд этишича, Россия томони биринчи марта 2022 йилнинг баҳорида Истанбулда бўлиб ўтган Россия ва Украина ўртасидаги биринчи музокаралар чоғида, хавфсизлик кафолатлари доирасида Хитой тинчликпарвар кучлари масаласини кўтарган. “Axios” нашрининг ёзишича, Путин 15 август куни Аляскада Трамп билан учрашувда Украина хавфсизлигининг эҳтимолий кафолатларидан бири сифатида Хитойни тилга олган.

Шу билан бирга, Украина Президенти Владимир Зеленский 20 август куни Хитойни хавфсизлик кафиллари қаторида кўрмаслигини айтди.

“Биринчидан, Хитой бошиданоқ бу урушни тўхтатишимизга ёрдам бермади. Иккинчидан, Хитой дрон бозорини очиш орқали Россияга ёрдам берди”, деди Зеленский.

Унинг сўзларига кўра, Украина хавфсизлик кафолатларини фақат Россиянинг кенг кўламли босқинидан кейин унга ёрдам берган давлатлардан қабул қилади.

“Welt am Sonntag” газетасининг 23 август куни ёзишича, Хитой қўшинларини Украинага тинчликпарвар сифатида юбориш ғояси Европа Иттифоқида турли хил муносабатда бўлган. Бир томондан, Хитой каби глобал жанубдаги давлатларни тинчликпарвар миссияга жалб қилиш, ўт очишни тўхтатиш режимига риоя этилишини назорат қилиш учун Украинада халқаро қўшинларни жойлаштириш режасини қўллаб-қувватлашни кучайтириши мумкин.

“Аммо бошқа томондан, Хитой, биринчи навбатда, Украинада жосуслик билан шуғулланиши ва можаро юзага келган тақдирда, бетарафликни сақлаш ўрнига, аниқ россияпараст позицияни эгаллаши хавфи ҳам бор”, деб тушунтирди исмини ошкор қилмаслик шарти билан гапирган муҳокамалардан хабардор Европа Иттифоқининг юқори мартабали дипломати.

Хитой расмийлари Украинага тинчликпарвар кучларни юбориш масаласи муҳокама қилинаётгани ҳақидаги маълумотни бир неча бор рад этиб келади. 

“ОАВнинг бундай режалар ҳақидаги хабарлари ҳақиқатга тўғри келмайди”, деди Хитой Ташқи ишлар вазирлиги матбуот котиби Го Цзякунь.