Россия нефтсиз қолмоқда – ОАВ

Август ойининг ўзида Украина томонидан уюштирилган ҳужумлар оқибатида Россиянинг 10 та нефтни қайта ишлаш заводи ишдан чиқди ва оқибатда мамлакат умумий қувватининг камида 17 фоизи, яъни кунига 1,1 миллион баррель нефть (1 барреллик ҳажм тахминан 159 литрга тенг) йўқотилди. Бу ҳақда мамлакат ичидаги манбаларига таяниб, “Reuters” хабар берди.

Ушбу йўқотишлар сабабли Россия ғарбий портлардан нефть хомашёси экспорти режасини қайта кўриб чиқмоқда. Қайд этиш жоиз, август ойи учун экспорт ҳажми кунига 200 минг баррелга камайтирилган, бироқ давом этаётган кетма-кет ҳужумлар ва таъмирлаш ишларидаги кечикишлар сабаб келгусидаги экспорт режаси қоронғулигича қолмоқда. 

Келаётган сентябрь ойи бўйича эса нефть сотувчилари ҳали якуний режаларни олмаган. Айрим манбаларнинг ҳисоблашича, “Дружба” қувурига ва Усть-Луга йўналишига етказилган зарар экспорт ҳажмини кунига 500 минг баррелгача қисқартириб юборган. 

Яна бир манбага кўра, Усть-Луга порти ҳозирча ўзининг 700 минг баррелга тенг имкониятидан атиги ярми билан ишламоқда ва қачон тўлиқ қувватга қайтиши номаълум. Бу балки Россияга нисбатан жорий қилинадиган санкциялар юқори чўққисига чиққани сабабли содир бўлган бўлиши мумкин. 

“Deutsche Welle” нашрининг маълумотига кўра, ҳужумлар Россиянинг нафақат ишлаб чиқаришини издан чиқарган, балки мамлакатнинг бир қатор ҳудудларида бензин танқислигига ҳам олиб келган. Хусусан, Новокуйбишевск, Саратов, Самара, Волгоград ва Сизрань заводлари тўлиқ тўхтаб қолган, шунингдек, Афипский, Славянск ва Новошахтинскдаги ишлаб чиқариш бинолари ҳам ҳужумга учраган. 

“Reuters” нашри 1 август куни ҳам нефть бозоридаги харидор ва савдогарларга таянган ҳолда Россияда август ва сентябрь ойларида бензин етказиб беришда узилишлар кутилаётганини хабар берган эди. 2024 йилда дрон ҳужумларидан сўнг, Россия ҳукумати бензин ва дизель ишлаб чиқариш статистикаларини ошкор қилмай қўйган, нашр ҳисоб-китобига кўра, ўтган йили нефтни қайта ишлаш ҳажми сўнгги 12 йилдаги энг паст даражага – 269,9 миллион тоннага тушиб кетган.

Эслатиб ўтамиз, Украина кучларининг “Дружба” нефть қувурига зарба бергани ҳақида илк хабарлар 22 август куни матбуотда тарқалган. Ушбу йўл орқали Венгрияга ҳам нефть етказиб берилар эди. Будапештга кўра, қувур камида беш кунга ишдан чиққан. Ҳужумга учраган қувур Россиянинг Брянск вилоятидан ўтади.

Ҳужумдан кейин бир неча кунга нефтсиз қолган Венгрия дарғазаб бўлди ва Украинани “Венгрияга қарши уруш” бошлаганликда айблади. Мамлакат Бош вазири Виктор Орбан Трампга хат йўллаб, Украинани “нонкўрлик”да айблади. 

“Беш кун аввал, Трамп ва Путин тарихий учрашуви арафасида, Украина Россиядаги “Дружба” нефть қувурига дронлар билан зарба берди. Венгрия Украинага электр ва ёнилғи билан ёрдам бериб келмоқда, лекин бунинг эвазига улар бизни таъминлайдиган қувурни уришди. Бу жуда душманона қадам”, дея ёзган Орбан.

Трамп эса хатга ўз қўллари билан жавоб ёзиб, Украинанинг бу ишидан “жуда ғазаблангани”ни билдирди.

Шу орада Киев ҳам Венгриянинг “уддабуронлиги”дан хабар топиб, Будапешт расмийларини Зеленскийга ақл ўргатмасликка чақирди.