Малайзияда жума намозига чиқмаган эркаклар қамалиши мумкин

Малайзиянинг Тренгану штати жума намозига бормаган эркакларни қамоқ билан жазоламоқчи. Бу ҳақда “The Guardian” хабар берди.

Янги қоидага кўра, шариат қонунлари асосида биринчи марта жума намозини сабабсиз қолдирган эркак икки йилгача озодликдан маҳрум этилиши, 3 минг ринггит (тахминан 8 млн 770 минг сўм) жарима тўлаши ёки иккаласи биргаликда қўлланиши мумкин. Ушбу тартиб жорий ҳафтадан бошлаб кучга кирди. Қоидалар Pan-Malaysian Islamic Front томонидан эълон қилинган. 

Қайд этиш жоиз, аввалроқ кетма-кет уч жума намозини қолдирганларга олти ойгача қамоқ ёки 1 минг ринггит (2 млн 923 минг сўм) жарима белгиланган эди. Энди диний патруллар ҳамда Тренгану Ислом ишлари департаменти биргаликда назорат ишларини амалга оширилади.

Ушбу чора танқидчиларнинг кескин эътирозига сабаб бўлган. 

“Бундай қонунлар Исломга ёмон ном чиқаради”, деган жамоатчилик фаоллари. 

Унга кўра, диний эркинлик – бу фақат ишониш ёки қатнашиш эркинлиги эмас, балки ишонмаслик ёки қатнашмаслик ҳуқуқини ҳам ўз ичига олади. Шу сабаб Тренгану ҳукуматининг бу қарори инсон ҳуқуқларини очиқчасига бузмоқда. Фаоллар мамлакат раҳбариятини ушбу жазоларни бекор қилишга чақирган.

Шу билан бирга, Тренгану штати қонунчилик мажлиси аъзоси Муҳаммад Халил Абдул Ҳади жазо чоралари фақат охирги чора сифатида қўлланишини айтиб ўтган. Унга кўра, жума намози нафақат диний рамз, балки мусулмонларнинг итоаткорлигини ифода этувчи амалдир.

Тренгану ҳукумати ушбу чоралар ҳақида нашрнинг сўровига жавоб бермаган. 

Нашрнинг қўшимча қилишича, аслида бу қонун 2001 йилда қабул қилинган бўлиб, 2016 йилда Рамазон ойини ҳурмат қилмаслик ва аёлларга кўчада тегажоғлик қилиш каби жиноятлар учун оғирроқ жазо чоралари билан кенгайтирилган эди. Малайзияда Ислом давлат дини бўлса-да, мамлакатда икки йўналишда қонун тизими амал қилади – фуқаролик қонунлари билан бирга мусулмонларга оилавий ва шахсий масалаларда шариат судлари ҳукмронлик қилади. 34 миллион аҳолининг тахминан учдан икки қисми мусулмонлардан иборат.