Эрдўған Макрон билан Украина ва Ғазодаги масалаларни муҳокама қилди

Бугун, 21 август куни Туркия Президенти Ражаб Тойиб Эрдўған ва Франция раҳбари Эммануэль Макрон телефон орқали мулоқоқт қилди. Бу ҳақда “Anadolu” хабар берди.

Маълум қилинишича, суҳбат Франция ташаббуси билан бўлиб ўтган. Унда минтақавий ва халқаро кун тартибидаги долзарб масалалар кенг муҳокама қилинган. Жумладан, Туркия ва Франция ўртасидаги икки томонлама муносабатлар, Россия ва Украина ўртасидаги можарони тинч йўл билан ҳал қилиш жараёни ҳамда Ғазо секторидаги вазият кўриб чиқилган.

Президент Эрдўған Туркия Россия ва Украина ўртасида адолатли тинчликка эришиш учун саъй-ҳаракатларни давом эттираётганини қайд этган. Давлат раҳбари Анқара яқинда Аляска ва Вашингтонда бўлиб ўтган Украина бўйича музокараларнинг боришини диққат билан кузатганини таъкидлаган. Туркия Президенти Анқара бундан кейин ҳам Россия ва Украина ўртасидаги тинчлик музокаралари доирасида барча зарур қадамларни ташлашга тайёр эканини билдирган.

Президент Эрдўған Ғазо секторида кенг кўламли гуманитар фалокат юз бераётганини таъкидлаган ва Исроилнинг бу ҳудудни босиб олиш режасини тезлаштирган “масъулиятсиз ҳаракатларини” жиловлаш зарурлигини қайд этган. 

Икки мамлакат раҳбарлари телефон суҳбати давомида муҳокама қилинган масалаларни 2025 йилнинг сентябрь ойида Нью-Йоркда ўтказилиши режалаштирилган БМТ Бош Ассамблеяси сессияси доирасида батафсил давом эттиришга келишиб олган.

Шунингдек, Президент Эрдўған Туркия Франция билан ҳамкорликни ривожлантиришга катта аҳамият беришини қайд этиб, Анқара бундан буён ҳам Париж билан ҳар томонлама муносабатларни, хусусан мудофаа саноати соҳасида янада ривожлантириш учун зарур чораларни кўришини таъкидлаган. 

Маълумот учун, 15 август куни АҚШнинг Аляска штатида Трамп ва Путиннинг учрашуви бўлиб ўтди. Учрашув Тошкент вақти билан 16 август куни соат 04:25 да якунланди. Аляскада бўлиб ўтган музокаралар якунида Трамп ва Путин биргаликдаги матбуот анжуманида қатнашди.

Матбуот анжуманидан олдин Путин ва Трамп “учга-уч” форматида тахминан 2 соат 45 дақиқа давом этган музокаралар ўтказди. Трамп кўплаб масалалар бўйича келишувга эришилганини таъкидлади, бироқ Украина масаласида ҳали битим йўқлигини қайд этди. Путин эса музокараларни фойдали, деб атаб, Россия Украинага хавфсизлик бўйича ишлашга тайёрлигини билдирди. Давлат раҳбарлари журналистларнинг саволларига жавоб бермади.

Эслатиб ўтамиз, аввалроқ Франция Президенти Эммануэль Макрон Европа мамлакатлари Украинага “тинчликпарвар кучлар” ва қуруқликдаги операциялар орқали ёрдам бериши кераклигини айтганди. Макронга кўра, тинчликни таъминлаш учун кучли Украина армияси зарур бўлади ва Украинага қуруқликдаги операциялар билан ёрдам кўрсатиш шарт. У, шунингдек, Украинага иттифоқчилари томонидан тақдим этилиши мумкин бўлган тинчликпарварлик миссияларига эҳтиёж туғилишини таъкидлаган.