Энди вояга етмаган мигрантлар Россияга киритилмаслиги мумкин

Россия Давлат думасига вояга етмаган мигрантларнинг мамлакатга киришини чеклаш бўйича қонун лойиҳаси киритилди. Бу ҳақда “Коммерсантъ” хабар берди.

Ҳужжатда мигрант болаларни ота-онасисиз ёки уларнинг бошқа қонуний вакилларисиз, шунингдек, оиласи томонидан берилган нотариал ишончнома билан бирга келган катталарсиз Россияга киритмаслик таклиф этилмоқда. Муаллифларнинг таъкидлашича, баъзи ўсмирлар мамлакатга ўқиш ёки даволаниш баҳонасида кириб, иш излашга тушади. Бироқ ҳукумат бу ташаббусни “болаларнинг қаровсизлиги муаммосини” ҳал қилмайди, деб ҳисобламоқда.

Қонун лойиҳасини депутат Нина Останина ва парламентнинг меҳнат бўйича қўмитаси раиси, мустақил депутат Ярослав Нилов тақдим этган. Улар “вояга етмаган чет эллик фуқаро” тушунчасини қонунчиликка киритишни таклиф қилмоқда. Шунга кўра, бундай болалар Россияга фақат ота-онаси, бошқа қонуний вакиллари ёки уларнинг розилиги билан келган катталар ҳамроҳлигида кириши мумкин бўлади. Бу тартиб фақат таълим олиш, даволаниш ва вақтинчалик бўлиш (масалан, спорт мусобақалари, олимпиадалар, саёҳатлар) билан чекланади. Шунингдек, агар чет элликларга берилган вақтинчалик яшаш рухсатномаси бекор қилинса, улар болалари билан бирга депортация қилиниши кўзда тутилмоқда.

Депутатлар тақдим этган тушунтириш хатида ҳозирги вақтда вояга етмаган чет элликлар ота-онаси билан ҳам, уларнинг розилигисиз мустақил равишда ҳам Россияга кира олиши эслатиб ўтилган. Бу эса уларнинг мамлакатда қонуний вакилларисиз қолиб кетишига олиб келаётгани айтилади. Айрим ҳолларда улар расмий равишда ўқиш учун киргани кўрсатилган бўлса-да, аслида иш излаш учун боргани таъкидланган. Депутатлар статистикага таяниб, 2025 йилнинг биринчи ярмида Россияда асосан 7–14 ёш оралиғидаги 765 минг чет эллик бола бўлгани, уларнинг кўпи Тожикистон, Қирғизистон ва Ўзбекистондан экани ҳақида маълумот берган. Ички ишлар вазирлиги эса 2024 йилда 1,5 минг бола миграция қоидаларини бузганлик учун вақтинчалик сақлаш марказларига жойлаштирилганини маълум қилган.

Бироқ ҳукумат бу ташаббусни танқид қилган. Расмий хулосада чет эллик болаларга ота-онасисиз киришга рухсат берувчи норма халқаро ҳуқуқ қоидалари билан мос келиши ва таълим, даволаниш ҳамда саёҳат учун зарурлиги қайд этилган. Ҳукумат вакиллари ишончномалар болаларни қаровсиз қолишидан ҳимоя қила олмаслиги, уларнинг ҳақиқийлигини аниқлаш тартиби белгиланмаганини ва депутатлар келтирган статистикада болаларнинг ота-онасисиз қандай шароитда Россияга келиб қолганига оид маълумот йўқлигини кўрсатган. Шу сабабли қонун лойиҳасини қайта ишлаш лозимлиги таъкидланган.

Эслатиб ўтамиз, аввалроқ Россия Давлат думасига турли фракцияларнинг вакиллари томонидан мигрантлар учун мактаб таълимини пулли қилиш ва рус тилини билиш бўйича бепул тест топшириш имкониятлари сонини чеклашни назарда тутувчи қонун лойиҳаси киритилганди.