Путин можарони “музлатиш”га тайёр эканини айтди
Олам
−
17 Август 2025 8082 2 дақиқа
Россия Президенти Владимир Путин АҚШ етакчиси Дональд Трампга Аляскадаги музокаралар чоғида Украина қўшинларини Донбассдан олиб чиқиб кетиш эвазига Украинадаги можарони “музлатиб қўйиш”га тайёрлигини айтди. Бу ҳақда “Financial Times” тўртта манбасига таяниб хабар берди.
Бунинг эвазига Путин жанубий Херсон ва Запорожье вилоятларида фронт чизиғини тўхтатиб қўйишга ва янги ҳужумлардан тийилишга ваъда берган.
Газетанинг ёзишича, Трамп бу хабарни Украина Президенти Владимир Зеленский ва Европа етакчиларига кеча, 18 август куни телефон орқали етказган ва у уларни Москвани ўт очишни тўхтатишга рози бўлишга мажбурлаш ҳаракатларидан воз кечишга чақирган.
Зеленскийнинг позициясидан хабардор манбалар у Донецк вилоятининг бир қисмини Россияга беришга рози бўлмаслигини, бироқ Трамп билан эртага, 18 август куни учрашадиган Вашингтонда ҳудудий муаммони муҳокама қилишга тайёрлигини айтди.
Путин, шунингдек, можаронинг “асосий сабабларини бартараф этиш” бўйича ўзининг асосий талабларидан воз кечмаганини ҳам аниқ айтган. Россиянинг собиқ юқори лавозимли амалдорига кўра, Россия Президенти “асосий сабаблар” бартараф этилганига ишончи комил бўлса, бошқа масалаларда, жумладан, ҳудуд бўйича ҳам муроса қилишга тайёр.
“Bloomberg”нинг ёзишича, Аляскадаги саммитдан кейин телефон қўнғироғи чоғида Трамп Зеленскийга ҳудудлар бўйича қарор Украинада қолишини айтган. Трамп, шунингдек, Россия Президенти Владимир Путиннинг позицияси ўзгармаганини таъкидлаган. Оқ уй раҳбарига кўра, Путин ҳамон Донбасснинг бутун ҳудудидан Украина қўшинларини олиб чиқиб кетишни талаб қилмоқда.
Июнь ойининг охирида Луганск Халқ Республикаси раҳбари Леонид Пасечник Россия қўшинлари минтақанинг бутун ҳудудини босиб олганини маълум қилган эди. Март ойида Путин Россия ДХР, Херсон ва Запорожье вилоятлари ҳудудининг 70 фоиздан ортиғини назорат қилишини маълум қилганди.
Россия Ташқи ишлар вазирлиги ҳудудлар алмашинувини муҳокама қилиш имконияти ҳақида гапирар экан, Россиянинг ҳудудий тузилиши Конституцияда мустаҳкамланганини айтди. 2024 йилнинг ёзида Владимир Путин ДХР, ЛХР, Запорожье ва Херсон вилоятлари ҳудудидан Украина қўшинларининг олиб чиқилишини Киев билан тинчлик музокаралари шартларидан бири, деб атади. Ҳозир ҳам Россия Президенти ушбу шартлар ўзгармаганини айтди. Зеленский эса Россия учун йўқотилган ҳудудларни тан олишни рад этди.
Эслатиб ўтамиз, Россия Президенти Владимир Путин 15 август куни Алясканинг Анкориж шаҳрида АҚШ Президенти Дональд Трамп билан ўтказилган музокаралардан сўнг, матбуот анжуманида Россия ва Украина ака-ука халқ, Украинада бўлаётган воқеалар эса Россия учун оғир фожиа эканини айтганди.
