Украина сулҳни муҳокама қилишга тайёр – Подоляк

Украина Президенти Владимир Зеленскийнинг офиси маслаҳатчиси Михаил Подоляк Украина Россия билан ҳаво ҳужумларини тўхтатиш бўйича сулҳни муҳокама қилишга тайёр эканини билдирди. Бу ҳақда у Италиянинг “Corriere della Sera” газетасига берган интервьюсида сўз очди.

Унинг айтишича, ҳаводан зарбалар беришдан воз кечиш самарали тинчлик музокаралари учун асос бўлиши мумкин.

“Россия стратегик авиация ва дронлардан оммавий фойдаланишдан воз кечиши эҳтимоли кам. Бироқ Украина бу сценарийни муҳокама қилишга, кўриб чиқишга тайёр ва буни реал музокара позициясига эришиш йўлидаги бошланғич босқич сифатида кўради”, деган Украина вакили.

Подолякнинг қўшимча қилишича, АҚШ ракета ва дрон ҳужумларидан воз кечишни ўз ичига олган тўлиқ ўт очишни тўхтатиш режасини таклиф қилган, бироқ Россия бу таклифни қабул қилмаган. “The Economist” нашрининг манбаларига кўра, АҚШ Президенти Дональд Трамп билан учрашув арафасида Россия Президенти Владимир Путин Украинада ҳавода ва денгизда чекланган сулҳ таклиф қилган. Учрашув 15 август куни Аляскада бўлиб ўтиши режалаштирилган.

Қолаверса, Подоляк келгуси Путин-Трамп мулоқотида уч томонлама учрашув ўтказилиши, унда Украина Президенти Владимир Зеленский ҳам иштирок этиши кераклигини таъкидлаган.

“Украина ва Зеленскийсиз украин масалаларини қандай ҳал қилиш мумкин?” деган у.

Эслатиб ўтамиз, бугун, 13 август куни Владимир Зеленский Европа етакчиларининг АҚШ Президенти Дональд Трамп билан видеоконференция йиғилишида иштирок этиш учун Берлинга бориши ҳақида хабар берилганди. Трампнинг Россия Президенти Владимир Путин билан Аляскадаги учрашуви олдидан ўтказилаётган суҳбат ташаббускори Германия канцлери Фридрих Мерц бўлган. Видеоконференцияда Зеленский, Трамп ва Мерцдан ташқари Буюк Британия, Италия, Польша, Финляндия ва Франция Президентлари ва ҳукумат раҳбарлари, Европа Комиссияси раиси Урсула фон дер Ляйен, Европа Иттифоқи Кенгаши президенти Антониу Кошта, НАТО Бош котиби Марк Рютте ва АҚШ вице-президенти Жеймс Дэвид Вэнс иштирок этади.