Япониядаги оролда оммавий эвакуация эълон қилинди

Япониянинг учинчи йирик ороли Кюсю ҳудудида кучли ёмғирлар туфайли юзага келган тошқин ва кўчкилардан сўнг бугун, 11 август куни минтақа ҳокимияти оммавий эвакуация эълон қилди. Бу ҳақда “The Japan Times” хабар берди.

Нашрга кўра, Куматомо префектурасида бир неча соат ичида 37 миллиметр ёғингарчилик кузатилган. Бу эса ўнлаб уйларга сув киришига, йўллардаги автомобиллар оқиб кетишига ва тупроқли йўлларнинг бузилишига олиб келган. Бир неча киши бедарак йўқолган, ҳалок бўлганлар ҳақида маълумот йўқ.

Маҳаллий ҳокимият маълумотига кўра, эвакуация тўғрисидаги огоҳлантириш жами 3 миллионга яқин аҳолига тегишли ҳудудларга тарқатилган. Энг хавфли зонада эса 380 мингдан ортиқ киши истиқомат қилади. Қутқарувчилар аллақачон сув босган уйлардан ўз кучи билан чиқиб кета олмаган бир нечта кексани эвакуация қилган.

Ноқулай об-ҳаво минтақадаги темирйўл қатновини ҳам издан чиқарган. Хусусан, тезюрар поездларнинг маҳаллий оператори Kyushu Railway Co вазият барқарорлашгунча қатновни тўхтатганини эълон қилган.

Эслатиб ўтамиз, аввалроқ Ҳиндистоннинг шимолидаги Уттаркаши шаҳрида кучли ёмғир ёғиши оқибатида тошқин юзага келиб, у бутун бир қишлоқни буткул вайрон қилганди.