Ўта ўнгчи Исроил вазири яна Ал-Ақсога борди

Исроил Миллий хавфсизлик вазири Итамар Бен-Гвир кеча, 3 август куни Қуддусдаги Ал-Ақсо масжиди ёнидаги мажмуага бориб, у ерда ибодат қилди.  Бен-Гвир бир гуруҳ одамларга бошчилик қилиб, мажмуа бўйлаб ўтаётгани акс этган видео “Маъбат тоғи маъмарияти” деб номланган кичик бир яҳудий ташкилоти томонидан эълон қилинди. 

Мусулмон ҳукуматлари билан бир неча ўн йиллар илгари тузилган, ҳали ҳам ўз кучини йўқотмаган сўзсиз келишувга кўра, Ал-Ақсо мажмуаси Иордания диний жамғармаси томонидан бошқарилади. Яҳудийлар у ерга бориши мумкин, аммо ибодат қилиши тақиқланган.

Ал-Ақсо масжиди мусулмонлар учун учинчи энг муқаддас зиёратгоҳ, Маъбат тоғи эса яҳудийликдаги энг муқаддас жой. Исроил 1967 йилги Яқин Шарқ урушида Ал-Ақсо мажмуасини эгаллаб олган. Иорданияга масканнинг қўриқчиси сифатидаги тарихий ролини давом эттиришга рухсат берилди, Исроил эса хавфсизлик ва кириш устидан назоратни ўз зиммасига олди.

Фаластинликлар сўнгги йилларда  яҳудий зиёратчилар у ерда тез-тез ибодат қилганини ва Исроил полицияси бунга аралашмаганини даъво қилмоқда. 

Исроилнинг расмий позицияси мусулмон бўлмаганлар ибодатхонасида ибодат қилишни чекловчи қоидаларни тан олади. Бен Гвирнинг ташрифидан сўнг Бош вазир Биньямин Нетаньяху Исроилнинг мажмуадаги статус-квони сақлаб қолиш сиёсати “ўзгармагани ва ўзгармаслигини” айтди.

Қуддуснинг девор билан ўралган Эски шаҳаридаги тепалик устидаги мажмуани бошқарадиган Вақф жамғармаси Бен-Гвир тоққа чиққан 1250 киши орасида бўлганини ва улар ибодат қилиб, бақириб, рақсга тушганини айтди. “The Times of Israel”нинг ёзишича, Миллий хавфсизлик вазири сифатида полицияни назорат қилувчи ўта миллатчи Бен-Гвир бу ерга аввал ҳам ташриф буюрган, бироқ бу унинг биринчи марта Маъбат тоғида очиқ ибодат қилишидир. Қароргоҳга ташриф буюрганида унга полиция ходимлари ҳамроҳлик қилган.

Бен-Гвир ўз баёнотида Исроилнинг Ғазо урушида ҲАМАСни мағлуб этиши ва исроиллик гаровга олинганларнинг қайтарилиши учун дуо қилаётганини айтди. У Исроилнинг бутун анклавни босиб олишга чақириғини такрорлади.

Фаластин Президенти Маҳмуд Аббоснинг матбуот котиби Набил Абу Рудейне Бен Гвирнинг “барча қизил чизиқларни кесиб ўтган” ташрифини қоралади.

“Халқаро ҳамжамият, хусусан, АҚШ маъмурияти кўчманчилар жинояти ва ўта ўнг ҳукуматнинг Ал-Ақсодаги провокацияларини тўхтатиш учун зудлик билан аралашиб, Ғазодаги урушни тўхтатиб, гуманитар ёрдам етказилишини таъминлаши керак”, деди у.

Иордания ҳам Бен Гвирнинг сўнгги ташрифини “қабул қилиб бўлмайдиган провокация” деб атади.