Трамп Россия яқинига юборган 2 сувости кемаси манзилига етиб борди (видео)

АҚШ Президенти Дональд Трамп Россиянинг собиқ президенти Дмитрий Медведев билан сиртдан жанжаллашганидан сўнг “тегишли ҳудудга” жойлаштиришни буюрган АҚШнинг иккита ядровий сувости кемаси белгиланган манзилга етиб борди. Бу ҳақда  кеча, 3 август куни Трамп Нью-Жерсидан Вашингтонга учишидан олдин журналистларга маълум қилди.

“Улар аллақачон бўлиши керак бўлган минтақада”, деди Трамп.

У сувости кемалари қайси минтақада жойлаштирилгани, улар ядро иншоотлари ёки ядровий қуроллар билан жиҳозланганига аниқлик киритмади. АҚШ ядровий сувости кемаларининг жойлашуви жуда сирлигича қолмаоқда.

Трампнинг иккита ядровий сувости кемасини “тегишли ҳудудларга” жўнатиш ҳақидаги буйруғи 1 август куни маълум бўлди. У бу ҳаракатини Дмитрий Медведевнинг “ўта провокацион баёнотлари” билан изоҳлади.

28 июль куни Медведев Х ижтимоий тармоғида Россияга қарши санкциялар тарафдори бўлган америкалик сенатор Линдси Грэм билан жанжаллашиб қолган.

У Оқ уй раҳбарининг янги ультиматумини – Украинадаги урушни тугатиш бўйича келишувга эришиш муддатини 50 кундан 10 кунга қисқартиришни – Россия ва АҚШ ўртасидаги “таҳдид ва уруш сари қадам”, Трамп ва Грэмни эса “боболар” деб атади.

Бунга жавобан Трамп 31 июль куни Truth Social'да Россия нефтининг йирик импортчиларидан бири бўлган Ҳиндистон ва Россия иқтисодларини “ўлик” деб атади. У Медведевни “тилини тийишга” чақирди ва “жуда хавфли ҳудудга кираётганини” қайд этди.

Ўша куни Медведев ўзининг Telegram-каналида “Россия собиқ президентининг баъзи сўзлари бутун, даҳшатли АҚШ Президентида шундай асабий реакцияга сабаб бўладиган бўлса”, “Россия ҳамма нарсада ҳақ ва ўз йўлидан боришда давом этади”, деб ёзди.