Трамп Россия бўйича “муҳим баёнот” беришини айтди

АҚШ Президенти Дональд Трамп жорий йилнинг 14 июль куни Россия бўйича “муҳим баёнот” билан чиқишини эълон қилди. Бу ҳақда Оқ уй раҳбари NBC News телеканалига берган интервьюсида сўз очди.

Трамп интервью давомида Россиядан ҳафсаласи пир бўлганини айтиб, яқин ҳафталарда вазият қандай ривожланиши бўйича кузатув кетаётганини билдирган. Бироқ батафсил тафсилотларни очиқламаган.

Шунингдек, Трамп АҚШ, НАТО ва Украина ўртасида эришилган янги қурол-аслаҳа етказиб бериш бўйича битим тафсилотларини маълум қилган. Унга кўра, АҚШ қуролни НАТОга юборади, альянс эса уни Украинага узатади ва тўлиқ харажатни қоплайди. Бу битим НАТОнинг ўтган ойги саммитида тузилган.

Трамп шунингдек, Россияга нисбатан янги санкциялар киритилиши бўйича якуний қарор ўзида қолишини айтган. 

АҚШ Давлат котиби Марко Рубио яқинда Малайзияда Россия делегацияси билан учрашувда Украина бўйича янги таклифлар билдирилганини айтган, аммо уларнинг мазмуни очиқланмаган. 

Рубио шунингдек, Трамп санкцияларни “реал вариант” сифатида кўраётгани, лекин уларни қандай ва қачон қўллашда эркинликни хоҳлашини айтган.

Эслатиб ўтамиз, аввалроқ АҚШ Президенти Дональд Трамп Россия Президенти Владимир Путиндан кескин норози эканини билдириб, Кремль раҳбари Вашингтоннинг барча саъй-ҳаракатларига қарамай, Украинадаги жанговар ҳаракатларни тўхтатишни истамаётганини айтганди.