Рубионинг дипфейкидан фойдаланган фирибгарлар ТИВ раҳбарлари билан боғланди

Фирибгарлар сунъий интеллект дастурий таъминотидан фойдаланиб, АҚШ Давлат котиби Марко Рубио ниқоби остида юқори мартабали хорижий дипломатлар ва Америка расмийлари билан бир неча бор боғланган. Бу ҳақда АҚШ Давлат департаментидаги  манбалари ва ички ҳужжатларига таяниб, “The Washington Post” хабар берди.

Нашрнинг ёзишича, камида учта Ташқи ишлар вазири, АҚШ штатларидан бирининг губернатори ва АҚШ Конгрессининг бир қонун чиқарувчиси фирибгарлик ҳаракатлари қурбонига айланган. Фирибгарлар алоқа учун Signal мессенжеридаги сохта аккаунтдан фойдаланган. Улар Рубионинг ёзиш услуби ва Давлат котибининг овозига тақлид қилувчи матн ва аудио хабарларни ҳужумчилар томонидан олдиндан қўлга киритган шахсий аккаунтларига жўнатган.

АҚШ федерал агентликларига юборилган ички ҳужжатда Давлат департаменти бу ҳаракатларни ким ва қандай мақсадларда содир этгани ҳозирча номаълумлиги, бироқ гап “маълумот ёки аккаунтларга кириш” мақсадидаги фирибгарлик ҳақида кетаётган бўлиши мумкинлиги таъкидланади.

Шунингдек, фирибгарлар билан алоқада бўлган жабрланувчилар қандай ҳаракатлар қилгани ҳам номаълум. Давлат департаменти ўз ҳужжатида федерал ходимлардан департаментнинг юқори мартабали амалдорларининг мессенжерлар орқали сўровлари билан боғлиқ барча шубҳали алоқалар ҳақида хабардор қилишни сўраган.

Нашрнинг қайд этишича, бу АҚШ Президенти Дональд Трамп маъмуриятида биринчи бундай ҳолат эмас. Май ойида номаълум шахслар Оқ уй аппарати раҳбари Сьюзан Уайлснинг телефонини бузиб, бир қанча губернаторлар, сенаторлар ва бизнес раҳбарларига қўнғироқ қилган.

Апрель ойи охирида Трамп АҚШ расмийларига ҳукумат махфий маълумотларининг сизиб чиқиши фонида Signal мессенжеридан фойдаланишни тўхтатишни таклиф қилган эди.

Аввалроқ “Associated Press” агентлиги АҚШ Мудофаа вазири Пит Ҳегсетнинг Пентагондаги идораси хавфсизлик протоколларини четлаб ўтувчи ҳимояланмаган интернетга кириш нуқтаси билан жиҳозлангани ҳақида хабар берганди. Бундан олдин WP манбаларга таяниб, Ҳегсет уяли алоқа этишмаслигини қоплаш учун Пентагонда ўз компьютерига махфий маълумотларни узатиш учун мўлжалланмаган мессенжерни ўрнатганини хабар қилди.