Туркиянинг курорт ҳудуди аланга ичида қолди

Туркиянинг курорт ҳудуди бўлган Эгей денгизи соҳилидаги Чешме туманида кучли ўрмон ёнғини юз берди, олов турар-жой биноларига яқинлашди. Бу ҳақда NTV телеканали хабар берди.

Қайд этилишича, ёнғин жорий йилнинг 2 июль куни маҳаллий вақт билан 13:40 да Илдир қишлоғидаги қишлоқ хўжалиги ерларида бошланган, кучли шамол сабаб олов ўрмонларга тарқалган.

Ёнғинни ўчиришга 5 та самолёт, 18 та вертолёт, 36 та ёнғин ўчириш машинаси жалб этилган. Ёнғин туфайли Илдир, Гермиян ва Нохуталан қишлоқларининг аҳолиси эвакуация қилинган. 

Ёнғин оқибатида Чешме курорти пляжларидан тутун кўринган, ижтимоий тармоқларда эса “курорт ёнмоқда” мазмунидаги суратлар тарқалган. 

Қишлоқ ва ўрмон хўжалиги вазири Иброҳим Юмакли берган баёнотида Мендерес ва Сефериҳисар туманларида бир неча кундан буён давом этаётган ёнғинлар ниҳоят ўчирилганини айтган. 

Ўрмон ёнғинлари 2 июль куни Туркиянинг ғарбий ҳудудларидаги Бурса ва Коджаэли вилоятларида ҳам бошланган. Ички ишлар вазири Али Ерлиқоянинг маълум қилишича, учта вилоятда 50 мингдан ортиқ фуқаро ўрмон ёнғинлари сабабли эвакуация қилинган. Адлия вазири Йилмаз Тунчнинг сўзларига кўра, Туркияда ёнғинлар билан боғлиқликда гумон қилиниб, 17 киши ҳибсга олинган.

Эслатиб ўтамиз, аввалроқ Туркиянинг бир нечта вилоятларида, жумладан, курорт ҳудудларида ҳам ўрмон ёнғинлари кузатилаётгани ҳақида хабар берилганди.