Озарбайжон диаспораси раҳбари қўйиб юборилди (видео)

Екатеринбургдаги Озарбайжон диаспораси раҳбари Шахин Шихлинский сўроқдан сўнг қўйиб юборилди. Бу ҳақда унинг ўғли Мутвали маълум қилди.

Билдирилишича, Шихлинский ҳодиса бўлганидан кейин гувоҳ сифатида Тергов қўмитасининг ҳудудий бошқармасига олиб борилган. 

Кеча, 1 июль куни махсус кучлар ходимлари Шихлинскийни “Баку Плаза” савдо маркази ёнида йўл ўртасида ушлашга уринди. Интернетда Шихлинскийни қўлга олиниши акс этган видеолар ҳам тарқалди.  Унда ичида диаспора раҳбари бўлган Mercedes-Benz G-класси автомобили ўраб олингани ва ходимлардан бири ׅ“гелик”нинг ойнасини синдирганини кўриш мумкин. Шундан сўнг озарбайжонликлар қўлга олиниб, юзлари ерга қаратилган ҳолда ётқизилган.

“Oxu.Az”нинг ёзишича, Шахин Шихлинскийга нисбатан жиноий гуруҳ ташкил этганлик (Россия Федерацияси Жиноят кодексининг 210-моддаси) моддаси бўйича иш қўзғатилиши мумкин. Бироқ ҳозирча диаспора раҳбарининг расмий процессуал мақоми ҳақида ҳеч қандай маълумот берилмаган. Унинг ўғли Мутвали Шихлинскийнинг таъкидлашича, отаси аввалроқ қўзғатилган жиноят ишлари бўйича гувоҳ ҳисобланади.

“E1.RU”нинг маълумотига кўра, куч тузилмалари Шахин Шихлинскийни айнан 2001 ва 2011 йиллардаги икки буюртма асосидаги қотиллик ҳамда 2010 йилдаги қотилликка суиқасд ҳолатларининг буюртмачиси деб ҳисобламоқда. Гўё у Таганский бозоридаги савдодан тўлов беришдан бош тортган Юнис Пашаевни ўлдиришга розилик берган. Кейинчалик Пашаев вафотидан сўнг амалда иккига бўлиниб кетган диаспоранинг бир қисмига етакчига айланган Фехруз Шириновни йўқ қилишга уриниш бўлган. Бироқ Ширинов пистолетнинг ишламагани туфайли омон қолган ва ўғли билан бирга қотилни 2010 йилда қўлга туширган.

2011 йилда эса, Пашаев вафотидан кейин маълум бир муддат Шихлинский билан ҳамкорлик қилган, лекин кейинчалик диаспорани ким бошқариши ҳақида тортишувга борган Икрам Ҳожиев отиб ўлдирилган. У бошига узилган ўқ оқибатида ҳалок бўлган.

“Ҳозирча бу фақатгина иккита буюртма асосидаги қотиллик ва суиқасд бўйича қўзғатилган жиноят ишлари доирасида йиғилган материаллардир. Бу ишлар доирасида Россия Тергов қўмитаси Озарбайжон фуқароларини этник жиноий гуруҳ деб атаб, кўплаб қўлга олиш ишларини амалга оширди. Айнан мана шу жиноятларни ташкил этганлик айби Шахин Шихлинскийга қўйилиши мумкин, кейинчалик эса уюшган жиноий жамият тузганлик ҳам”, деб ёзади “E1.RU”.

Маълумот учун, июнь ойининг охирида Екатеринбургда ўтган йиллардаги қотиллик иши доирасида асли озарбайжонликлар қўлга олинди. Бир қатор нашрлар ўшанда Шихлинский иш доирасида сўроқ қилингани ҳақида хабар берган эди. Унинг ўзи буни ёлғон деб атаган.

Екатеринбург суди жиноий гуруҳ иши доирасида беш кишини ҳибсга олган: Аҳлиман Ганжиев, Мазоҳир, Акиф, Аяз ва Бакир Сафаров. Уларга нисбатан Жиноят кодексининг 105-моддаси 2-қисми “г” банди – аввал айрим аъзолари қўлга олинган уюшган гуруҳ томонидан содир этилган қотиллик бўйича айблов қўйилган.