Ким Украинада вафот этган аскарларини хотирлади

Шимолий Корея етакчиси Ким Чен Ин Россияга қарши урушда ҳалок бўлган КХДР ҳарбий хизматчиларини хотирлади. Бу ҳақда “Yonhap” хабар берди.

Таъкидланишича, ушбу маросим билан бирга Шарқий Пхеньянда гала-концерт ҳам ўтказилган. Бу тадбир Шимолий Корея ва Россия ўртасида имзоланган ҳарбий ҳамкорлик шартномасининг йиллиги муносабати билан бўлиб ўтган. 

Концерт давомида Курск вилоятида топилган ва қонга беланган шимолий кореялик аскарнинг дафтаридан сурат ҳам намойиш этилган. Унда ҳарбий ўз дўстларини “муқаддас жангда жасорат билан курашишга” чақирган. У ўз ёзувларида бу севгини ва ишончни уларга “севимли олий бош қўмондон” берганини қайд этган.

Мазкур тадбирда Россиянинг Маданият вазири Ольга Любимова ҳам иштирок этган. У 29 июнь куни КХДРга ташриф буюрган. 

Ким Чен Ин у ерда жанг қилган ҳар бир шимолий кореяликни қаҳрамон деб атаган ва уларнинг хотирасини абадийлаштиришга чақирган.

Маълумот учун, 2024 йилнинг 19 июнида Владимир Путин Пхеньянга қилган ташрифи чоғида стратегик ҳамкорлик тўғрисидаги шартнома имзоланган. Ушбу битимга кўра, ҳар икки давлат бошқа давлат томонидан қуролли ҳужумга учраган тақдирда бир-бирига ҳарбий ва бошқа шаклларда ёрдам кўрсатишга мажбур.

2024 йилнинг кузида КХДР ҳарбийлари Россиянинг Курск вилоятига юборилган ва у ерда Украина армиясига қарши жанг қилган. Дастлаб Россия ҳукумати бу ҳолатни инкор этган бўлса-да, 2025 йилнинг апрелида Мудофаа вазирлиги, Ташқи ишлар вазирлиги ва шахсан Президент Владимир Путин бу иштирокни тасдиқлади. Пхеньянда эса бу операция “ғалабали якунланган” деб эълон қилинди.