Нетаньяху Трамп билан “ғалаба”ни нишонламоқчи

Исроил Бош вазири Биньямин Нетаньяху келаси ҳафта АҚШнинг Вашингтон шаҳрига ташриф буюради ҳамда у ерда Оқ уй раҳбари Дональд Трамп билан учрашади. Бу ҳақда Бош вазир Исроил ҳукуматининг йиғилишида маълум қилди.

Нетаньяхунинг сўзларига кўра, у ташриф давомида Трампдан ташқари АҚШ вице-президенти Жеймс Дэвид Вэнс, Давлат котиби Марко Рубио, Мудофаа вазири Пит Хегсет, Президентнинг махсус вакили Стив Уиткофф ва Савдо вазири Говард Лютник билан ҳам учрашишни режалаштирган.

“Келаси ҳафта мен Қўшма Штатларга ташриф буюриб, АҚШ Президенти Дональд Трамп ва бошқа бир қанча расмийлар билан учрашувлар ўтказаман”, деган Бош бвазир. 

Нетаньяхунинг таъкидлашича, ушбу учрашув “Эрон устидан эришилган буюк ғалаба” фонида содир бўлмоқда. 

“Буларнинг барчаси бизнинг Эрон устидан олиб борилган операциямиз давомида эришган буюк ғалабамиз тўлқинида содир бўлмоқда”, дея қўшимча қилган Исроил вазири. 

Нетаньяху, шунингдек, “ғалабага эришиш қанчалик муҳим бўлса, ундан фойдаланиш ҳам шунчалик муҳимлиги”ни эслатиб ўтган. 

Вазирларга мурожаат қилар экан, у АҚШга боришидан олдин “савдо келишувига эришиш учун бир нечта масалаларни ҳал қилиш зарурлигини” билдирган. Бундан ташқари, Бош вазир АҚШда Конгресс ва Сенат раҳбарлари билан учрашиши ҳамда “хавфсизлик масалалари бўйича йиғилишларда” иштирок этишини ҳам қайд этган.

Эслатиб ўтамиз, жорий йилнинг 22 июнь куни Трамп Америка халқига мурожаат қилиб, мамлакат Эроннинг учта ядровий объектига – Фордо, Натанз ва Исфаҳонга зарба берганини эълон қилган эди. Исроил Бош вазири Биньямин Нетаньяху эса халққа қилган мурожаатида Трампга бу ҳужумлар учун миннатдорлик билдирган.

23 июнь куни эса Эрон АҚШнинг Яқин Шарқдаги энг йирик ҳарбий объекти – Қатар ҳудудидаги Ал-Удейд авиабазасига ҳужум қилган. Трамп Эроннинг бу жавобини “жуда заиф” деб баҳолади. Орадан бир кун ўтиб эса у Эрон ва Исроил ўзаро зарба алмашишни тўхтатишга келишганини эълон қилди. АҚШ Президенти бу келишувни “тенг шартли” деб атади ва уни “барча томонлар учун катта ғалаба” деб баҳолади.