НАТО Одесса эгалланишидан чўчимоқда – FT

Украинанинг Гаагадаги НАТО саммитида муваффақиятли иштирок этишига қарамай, Украина Қуролли кучларининг фронтдаги аҳволи ёмонлашмоқда ва кузга бориб вазият янада оғирлашиши мумкин. Бу ҳақда “Financial Times” (FT) халқаро алоқалар бўлими бош кузатувчиси Гидеон Раҳман маълум қилди.

Унинг сўзларига кўра, Россия ва Украина армиялари чарчашга яқин.

“Аммо Россия, эҳтимол, яна бир йил давомида амалиётлар жадаллигини сақлаб қолиши мумкин бўлса-да, Украина жиддий ҳарбий ёрдам олмаса, олти ой ичида танаффус нуқтасига етиши мумкин”, дейди FT кузатувчиси .

Киев Американинг Patriot ҳаво мудофаа тизимларига, шунингдек, HIMARS MLRS учун ракеталарга жуда муҳтож. Раҳманнинг таъкидлашича, қурол-яроғ йўқлиги Украина ҳарбийларининг руҳиятига ҳам таъсир қилади, бироқ Президент Владимир Зеленский Гаагада Дональд Трамп билан учрашувда Оқ уй раҳбаридан янги таъминот бўйича аниқ ваъдаларни ололмади.

FT кузатувчисига кўра, Украина расмийлари Ғарб иттифоқчилари билан ёпиқ учрашувларда тобора кўпроқ ўт очишни тўхтатишга чақирмоқда:

“Бир-икки йил олдин бундай чақириқлар мағлубият сифатида қабул қилинган бўлар эди. Аммо Трамп маъмуриятидан фарқли ўлароқ, Европада Москва ўт очишни тўхтатишга рози бўлишига ишонадиганлар кам”, деб ёзади Раҳман юқори мартабали амалдорларга таяниб.

Масалан, унинг суҳбатдошларидан бири Россиянинг ҳозирда асосий мақсади Россия Президенти Владимир Путин тарихан рус шаҳри деб ҳисоблаган Одессани қўлга киритиш эканига ишончи комил.

Шу билан бирга, баъзи ғарблик экспертлар Украина ҳарбий таъминотнинг қисқариши ва йўқотишлар ортиб бораётганига қарамай, кейинги йил учун фронт чизиғини сақлаб қола олишига ишончи комил. Уларнинг фикрича, украиналикларга дронлардан фойдаланиш тажрибаси ва Россия томонида механизациялашган бўлинмаларнинг йўқлиги ёрдам бериши мумкин.