Эрдўған Трамп билан нимани гаплашганини очиқлади

Агар Украина бўйича музокараларга Россия Президенти Владимир Путин қўшилса, АҚШ Президенти Дональд Трамп ҳам ушбу музокараларга иштирок этишга тайёр. Бу ҳақда Туркия Президенти Ражаб Тойиб Эрдўған TRT Haber'га берган интервьюсида сўз очди.

“Менимча, Россия ва Украина ўртасидаги урушда тинчликка умид бор. Биз томонларни яна бир марта музокара столига олиб келиш учун ҳаракат қиламиз. Ҳатто бу учун игна билан қудуқ қазиш керак бўлса ҳам, биз бунга тайёрмиз”, деган Эрдўған. 

Эрдўғаннинг сўзларига кўра, у НАТО саммити доирасида Трамп билан Россия-Украина можаросини муҳокама қилган. 

“Суҳбат давомида Трамп Президент Владимир Путин Истанбул ёки Анқарага келса, у ҳам Туркияга ташриф буюришини айтди”, деган Туркия раҳбари. 

Эрдўған бу имкониятни “тинчлик сари жиддий қадам” деб атаган ва музокараларни давлат раҳбарлари даражасида ўтказиш Туркиянинг асосий мақсади эканини таъкидлаган.

Маълумот учун, Россия ва Украина делегациялари ўртасидаги сўнгги музокаралар Истанбулда 16 май ва 2 июнь кунлари бўлиб ўтган. Музокараларда асирлар алмашинуви, ҳалок бўлган ҳарбийлар жасадларини топшириш каби шартларга келишилган ҳамда бу шартлар аллақачон амалга оширилиб ҳам бўлди. 

Эслатиб ўтамиз, Туркия Президенти Ражаб Тойиб Эрдўған кеча, 25 июнь куни НАТО саммити доирасида Гаагада АҚШ Президенти Дональд Трамп билан учрашганди. Президентлар ўртасидаги музокаралар ёпиқ эшиклар ортида ўтган.