АҚШ фуқароларини глобал хавфсизлик таҳдидидан огоҳлантирмоқда

Қўшма Штатлар Яқин Шарқдаги ҳарбий можаро муносабати билан ўз фуқаролари учун бутун дунё бўйлаб хавфсизлик огоҳлантиришини эълон қилди. Хавфсизлик огоҳлантириши кеча, 22 июнь куни Давлат департаменти томонидан эълон қилинди. 

“Давлат департаменти АҚШ фуқароларига бутун дунё бўйлаб эҳтиёткор бўлишни тавсия қилади”, дейилади баёнотда.

Баёнотда Американинг Эрон нишонларига зарбалари тўғридан тўғри тилга олинмайди, фақат Исроил ва Эрон ўртасидаги можарога ишора қилинади, бу эса “Яқин Шарқ бўйлаб саёҳатларнинг тўхтатилишига ва ҳаво кенгликларининг вақтинча ёпилишига олиб келди”.

“Хорижда АҚШ фуқаролари ва манфаатларига қарши намойишлар уюштириш эҳтимоли бор”, дейилади огоҳлантиришда.

Аввалроқ Қўшма Штатлар ўз фуқароларини Исроил ва Ғарбий Соҳилдан эвакуация қилишни бошлаган эди. Бундан ташқари, Ироқ ва Ливандаги дипломатик ваколатхоналар ходимларига бу давлатларни тарк этиш буюрилган.

22 июнга ўтар кечаси АҚШ Исроил ва Эрон ўртасидаги 13 июнда бошланган ҳарбий можарога кирди. АҚШ армияси Эрон ядровий дастурининг учта объектига зарба берди. B-2 бомбардимончилари Фордо заводига ўн иккита 13,6 тонналик бункер бомбаси билан ҳужум қилишди ва Натанзга яна иккита шундай бомба ташланган. Сувости кемалари Натанз ва Исфахондаги объектларга 30 та Tomohawk ракетасини учирди.

АҚШ Президенти Дональд Трамп халққа мурожаатида Эроннинг уран бойитиш бўйича энг муҳим иншоотлари йўқ қилинганини айтди.