Россия Украинадан таслим бўлишни талаб қилмаяпти – Путин

Россия Президенти Владимир Путин мамлакат Украинадан таслим бўлишни талаб қилмаётгани, балки ерда шаклланган реал ҳолатларни тан олишни истаётганини айтди. Бу ҳақда у Петербург халқаро иқтисодий форумининг ялпи мажлисидаги нутқида сўз очди.

Путинга савол билан юзланган журналист Трампнинг Эронни “сўзсиз таслим бўлиш”га мажбурлаш истагини эслаб, Путиндан “сиз, Россия Президенти сифатида Владимир Зеленскийдан ҳам худди шундай сўзсиз таслим бўлишни кутяпсизми?” дея сўраган. 

“Биз Украинадан таслим бўлишни талаб қилмаяпмиз. Биз ерда шаклланган реал ҳолатларни тан олишни талаб қиламиз”, деган Россия раҳбари. 

Қолаверса, Президент журналистлар билан суҳбатда Путин Украинадаги вазият тобора оғирлашаётганини таъкидлаган. 

“Энди гап фақат Донецк ва Луганск ҳақида эмас. Яна икки ҳудуд Россия таркибига қўшилди. Албатта, Қрим ҳам. Келинг, энди ана шу ҳақда гаплашамиз”, деган давлат раҳбари. 

Путиннинг сўзларига кўра, у можаро ечими учун исталган томон, жумладан Украина Президенти Владимир Зеленский билан ҳам учрашишга тайёр. 

“Масала бу эмас. Агар Украина ҳукумати музокаралар олиб бориш учун кимгадир ишонса, Худо ҳаққи, келинг бу Зеленский бўлсин. Масала бунда эмас, масала ҳужжатга ким имзо чекишида. Қулоқ солинг, мен ҳеч нарса ўйлаб топмадим.

Тарғибот нуқтаи назаридан, сиз ҳозирги ҳокимиятнинг қонунийлиги ҳақида хоҳлаган нарсангизни айтишингиз мумкин, аммо биз учун жиддий масалаларни ҳал қилишда ташвиқот эмас, балки қонун муҳим”, деган Путин.

Маълумот учун, Петербург халқаро иқтисодий форуми жорий йилнинг 18–21 июнь кунлари Санкт-Петербург шаҳрида бўлиб ўтмоқда. 2025 йилги форумнинг асосий мавзуси “Умумий қадриятлар – кўп қутбли дунёда ўсишнинг асоси”. 

Форумда йирик ва ўрта бизнес вакиллари, кичик корхоналар, халқаро компаниялар, давлат идоралари, экспертлар, таълим соҳаси вакиллари ҳамда ёш мутахассислар ва талабалар иштирок этмоқда.

Эслатиб ўтамиз, жорий йилнинг май ойи охирида Зеленский Путин ва АҚШ Президенти Дональд Трамп билан уч томонлама учрашув ўтказишни таклиф қилган эди. Дональд Трамп уч томонлама учрашувда иштирок этишга тайёрлигини билдирди. Бироқ Путин буни рад этганди.