Швейцариядаги қишлоққа кўчганларга катта пул ваъда қилинмоқда

Жануби-ғарбий Швейцарияда жойлашган Альбинен қишлоғига кўчиб келган ҳар бир одамга 20 минг Швейцария франки (тахминан 310 млн сўм)  ваъда қилинди. Бу ҳақда “Daily Mail” хабар берди.

Маълум қилинишича, ушбу ташаббус минтақада давом этаётган аҳолининг камайиши муаммосига қарши курашишга қаратилган. Holiday Pirates туристик портали маълумотига кўра, оилалар ҳар бир бола учун қўшимча 10 минг франк (тахминан 155 млн сўм) олишлари мумкин.

Бироқ бу таклифнинг ҳам ўзига хос шартлари бор. Аввало, янги аҳоли қишлоқда уй сотиб олиши керак, уларнинг нархи эса 200 минг Швейцария франкигача (яъни тахминан 3 млрд 100 млн сўм) бўлиши мумкин. Бундан ташқари, дастурга ариза берувчи одам 45 ёшдан катта бўлмаслиги керак.

Энг асосий шарт эса – Альбиненда камида 10 йил яшаш ва охир-оқибат Швейцария фуқаролигини олишдир. Фақатгина шунда кўчиб келувчиларга ваъда қилинган тўловлар амалга оширилади.

Айтилишича, бундай услубдан фойдаланаётган ягона мамлакат Швейцария эмас. Масалан, Италия ҳам янги аҳолини жалб қилиш учун пул мукофотларини таклиф қилмоқда. 

Эслатиб ўтамиз, аввалроқ Шарқий Германияда жойлашган Айзенхюттенштадт шаҳарчаси аҳолиси сонини ошириш мақсадида янги кўчиб келувчиларга икки ҳафталик бепул тураржой таклиф қилган эди.