Трампнинг жиноятчи Эпштейнга алоқаси борлиги айтилди

Tesla ҳамда SpaceX компаниялари эгаси, Ҳукумат самарадорлиги департаменти (DOGE) собиқ раҳбари, америкалик миллиардер Илон Маск АҚШ Президенти Дональд Трамп “Эпштейн файллари”да борлигини айтди. Бу ҳақда у Х саҳифасида ёзди.

“Ҳақиқий “бомба” ташлаш вақти келди. Бу улар ҳеч қачон нашр этилмаганининг асл сабабидир”, дея ёзган Маск Трампга қарата.

Эпштейн файллари молиячи Жеффри Эпштейннинг ҳужжатларидир. У биринчи марта 2006 йилда айбланган, фоҳишаликни ташкил қилишда айбини тан олган ва вояга етмаган қизни зўрлаганликда айбланган. Миллиардер 2019 йилнинг ёзида АҚШда яна қўлга олинди. У қизлар, жумладан, 14 ёшли болалар савдоси ва уларни фоҳишаликка ундашда айбланган эди.

2019 йилда Эпштейн ўнлаб вояга этмаган қизларни жинсий эксплуатация қилиш ва зўравонликка йўл қўйган жиноий тузилмани ташкил қилишда айбланган эди. Унинг қурбонлари 14 ёшда эди. Одам савдоси бизнеси бўйича асосан 2002 йилдан 2005 йилгача фаолият юритган. Бундан ташқари, Эпштейн гувоҳларга пора берганликда гумон қилинган.

2008 йилда у болаларга зўравонлик қилганликда айбланган. Молиячи қизларга интим хизматлари учун пул тўлагани ва уларни сотиши мумкинлиги исботланган. Ўшанда унинг адвокатлари енгил жазо олишга муваффақ бўлди – бу одам атиги 13 ойни қамоқда ўтказди ва унга кунига 12 соат, ҳафтасига 6 кун қамоқдан чиқиб, Флоридадаги офисида ишлашга рухсат берилди.

2019 йилда, молиячи ҳибсга олинганида, “The New York Times” газетасининг ёзишича, суд битимидан олдин Эпштейннинг кўплаб нуфузли дўстлари орасида жумладан Трамп, собиқ президент Билл Клинтон ва бошқалар бўлган.

Ҳибсга олинганидан сўнг, Эпштейн қўйилган айбловларни тан олмади ва ҳибсга олинганидан бир ой ўтиб ўз жонига қасд қилди. Агар айби исботланса, у 45 йилгача қамоқ жазосига ҳукм қилиниши мумкин эди.

Эслатиб ўтамиз, АҚШ Президенти Дональд Трамп ва Tesla ҳамда SpaceX компаниялари эгаси, Ҳукумат самарадорлиги департаменти (DOGE) собиқ раҳбари Илон Маск кеча, 5 июнь куни ижтимоий тармоқлар орқали жанжаллашди. Бунинг ортидан Маск бир кунда деярли 34 миллиард доллар, Трамп эса 1 миллиард доллардан кўпроқ даромадини йўқотди.