ҲАМАС АҚШнинг таклифини қабул қилишга тайёр, аммо шартлар билан

ҲАМАС ҳаракати АҚШ Президенти Дональд Трампнинг Яқин Шарқ бўйича махсус вакили Стив Уиткофф томонидан таклиф қилинган Ғазо секторида отишмаларни тўхтатиш бўйича янги келишувни қабул қилишга тайёр, аммо ҳаракатнинг ҳам ўзига яраша шартлари бор. Бу ҳақда “Al Arabiya” хабар берди.

Манбага кўра, ҲАМАС гаровдагиларини икки кун ичида озод қилиш ўрнига, 60 кун давомида кичик гуруҳларда босқичма-босқич чиқаришни талаб қилмоқда. Шунингдек, улар келажакдаги келишувни Исроил томонидан бажарилиши учун АҚШдан “ҳақиқий кафолатлар” талаб қилмоқда, чунки ҳозирги таклиф Исроил ҳукуматига Ғазода урушни қайта бошлаш бўйича эркинлик қолдириши мумкин, деб ҳисоблашмоқда.

Эслатиб ўтамиз, аввалроқ Фаластиннинг ҲАМАС гуруҳи АҚШнинг Яқин Шарқ бўйича махсус вакили Стив Уиткофф томонидан Ғазо секторида ўт очишни тўхтатиш бўйича янги таклифни қабул қилгани ҳақида хабар берилганди. Баъзи манбаларга кўра, сулҳни Исроил биринчи бўлиб қабул қилган, аммо ҲАМАС ҳалигача якуний қарорини айтгани йўқ. 

Ушбу сулҳ қуйидаги шартларни ўз ичига олади:

• Ғазо секторида 60 кунлик ўт очишни тўхтатиш;
• 10 нафар тирик гаровга олинган асирни озод қилиш;
• 18 нафар ҳалок бўлганлар жасадини қайтариш;
• Бунинг эвазига Исроил тахминан 1 500 нафар фаластинлик маҳбусни озод қилиши керак бўлади.