Россиялик депутат Сибирни “азалий ўзбеклар юрти” деб атади

Россиянинг Ханти-Мансийск округи думасининг Коммунистик партиядан сайланган депутати Холид Таги-Заде Сибир ўлкаси ўзбекларнинг тарихий маскани эканини айтди. Бу ҳақда депутат кеча, 29 май куни Ханти-Мансийск мухтор округи парламентининг сўнгги мажлисида сўз очди.

Унинг ушбу баёноти минтақанинг туб аҳолиси ўртасида туғилиш ва ўлим билан боғлиқ масалалар, шунингдек, Ўзбекистон фуқароларининг Сибирга кўчиши сабабларини муҳокама қилиш жараёнида пайдо бўлган.

“Тарихий Сибир хонлиги. Бу ерда Кўчимхон ҳукмронлик қилган, у эса Шайбонийлар сулоласидан – яъни Бухоро хонлигидан чиққан ўзбек ҳукмдорларидан. Балки ҳозирги мигрантлар ўз тарихий ватанларига қайтаётгандир?” деган депутат.

Ушбу фикрлар айрим рус экспертлари томонидан хавотир билан қабул қилинган. Айримлар буни “тарихий адолатни тиклаш” ниқоби остида бўлаётган сепаратистик кайфиятлар деб баҳолаган.

“Агар Ўзбекистондан келаётган мигрантлар ўз тарихий ерларига қайтмоқдаман дейишса – унда бу ерда яшаётган маҳаллий аҳоли ким бўлади? Бу хавфли йўналиш. Миллий диаспоралардан то ҳудудий даъволаргача бўлган йўл аста-секин босиб ўтилмоқда”, деган россиялик публицист Сергей Колясников.

Шу билан бирга, Москвадаги таниқли пиар-мутахассис, “Сыны монархии” Telegram-канали муаллифи Роман Антоновский депутатнинг бу чиқишидан хавотир билдирган.

“Таги-Заде – Россия фуқаролигини олган мигрантлар нега айрим ҳуқуқларда чекланиши кераклигининг яққол намунаси. У нафақат ассимиляцияга интилмаяпти, балки Россия ҳудудида бегона халқ манфаатларини илгари сурмоқда”, деган у.

Антоновскийнинг фикрича, бундай шахслар нафақат давлат тузилмаларида, балки умуман сиёсий фаолиятда иштирок этмасликлари керак. У Таги-Заденинг Россиядан депортация қилиниши лозимлигини таъкидлаган.

Маълумот учун, Холид Таги-Заде 1978 йил 15 ноябрда Озарбайжон ССРнинг Сумгаит шаҳрида туғилган. Миллати – озарбайжон. У 2001 йилда Сибирь федерал университетини “криминалистик кимё” ихтисослиги бўйича тамомлаб, кимёчи мутахассислигига эга бўлган. Бир вақтнинг ўзида С.А. Решетнёв номидаги Сибирь аэро-космик академияси ҳарбий факультетида ҳам таҳсил олган. 

У 2019 йилдан 2021 йилгача Мегион шаҳар Думасининг олтинчи ва еттинчи чақириқлари депутати, Мегион шаҳар Думасидаги Россия Федерацияси Коммунистик партияси фракцияси раҳбари, 2021 йилдан бери эса Ханти-Мансийск автоном округи Думаси – еттинчи чақириқ Угра депутати сифатида ишлаб келмоқда.