АҚШда ноқонуний муҳожир Трампни ўлдирмоқчи бўлди

АҚШ иммиграция расмийлари мамлакат Президенти Дональд Трампга суиқасд қилиш билан таҳдид қилган, Мексикадан келган ноқонуний муҳожирни ҳибсга олди. Бу ҳақда CNN хабар берди.

Ички хавфсизлик вазирлигининг маълумотига кўра, жорий йилнинг 21 май куни Иммиграция ва божхона назорати хизмати ходими Рамон Моралес Реес исмли шахсдан мактуб олган. Мактубда “Мен бу мамлакатни фақат Президент Трампнинг митингларидан бирида бошига ўқ узганимдан кейин тарк этаман”, дея ёзган мигрант.

Шунингдек, у АҚШ ҳукуматини мексикаликларга нисбатан камситиш ва оиласини депортация қилганликда айблаган.

54 ёшли Моралес 22 май куни ҳибсга олинган. Ички хавфсизлик вазирлигининг аниқлик киритишича, у 1998 йилдан 2005 йилгача АҚШ чегарасини ноқонуний равишда камида тўққиз марта кесиб ўтган. Шунингдек, у илгари бир неча бор жиноий жавобгарликка тортилган.
Депортация жараёни тугагунига қадар унинг Висконсин штатидаги қамоқхонада сақланиши кўзда тутилган.

Терговчиларнинг тахминича, бу мактуб бошқа бир шахс томонидан атайлаб ёзилган. Сабаби – Реес ҳозирда талончилик ва ҳужум бўйича суд жараёни бўлаётган ишда жабрланувчи сифатида қайд этилган. Улар мактуб орқали Реесни суд бўлишидан олдин депортация қилишга эришмоқчи бўлишган.

Маълумот учун, Трамп 2024 йилги сайлов кампаниясида АҚШдаги ноқонуний мигрантларга қарши курашишни асосий ваъдаларидан бири деб эълон қилган эди. У биринчи йил ичида 1 миллион мигрантни чиқариб юборишни режалаштирганди. Аммо мутахассислар бу режани ҳақиқатдан йироқ деб ҳисоблашмоқда, чунки бу жуда катта маблағ, кўп ходим талаб қилади ва кўпчилик мигрантлар ўз ҳуқуқларини судда ҳимоя қилишлари мумкин.

Эслатиб ўтамиз, аввалроқ АҚШнинг Бостон шаҳридаги суд Президент Дональд Трамп маъмуриятининг мигрантларни Ливияга ва Сальвадор давлатларига чиқариб юбориш режасини рад этганди.