Ўзбекистонда параатлетика бўйича жаҳон чемпионати ўтказилиши мумкин

Кеча, 29 май куни Бутунжаҳон пара енгил атлетика федерацияси (World Para Athletics) президенти Пол Фицжералд Тошкент шаҳрига ташриф буюриб, параатлетика бўйича жаҳон чемпионатини ўтказиш имкониятлари билан танишди. Бу ҳақда ЎзА хабар берди.

Қайд этилишича, Пол Фицжералд Ўзбекистон енгил атлетика федерацияси стадионига ташриф буюрган. Ташриф давомида у объектнинг инфратузилмаси, жумладан, югуриш йўллари, сакраш ва улоқтириш секторлари, шунингдек, ички бинолар ва мажмуанинг техник жиҳозланиши билан яқиндан танишган.

Шунингдек, “Лос-Анжелес-2028” Паралимпия ўйинларига тўғридан тўғри йўлланма берувчи пара енгил атлетика бўйича 2027 йилги жаҳон чемпионатини Ўзбекистонда ўтказиш имкониятларини муҳокама қилиниб, Фицжералд “Олимпия шаҳарчаси”да пара атлетлар учун яратиладиган шароитлар, дунё биринчилиги пайтида пара спортчиларни ўзида қабул қилувчи меҳмонхона ҳамда ресторанлар фаолиятини ҳам кўздан кечирган. Мажмуадаги “Паралимпия маркази” лойиҳаси билан ҳам танишган. 

Танишув сўнггида Пол Фицжералд Ўзбекистон ушбу халқаро мусобақаларни юқори савияда ўтказа олишига ишонч билдирган.