Путин тинчлик учун Ғарбдан ёзма кафолат истаяпти – ОАВ

Россия Президенти Владимир Путин Украинадаги урушни тугатиб, тинчликка эришишга тайёр, бироқ бу – ҳар қандай кичик нарх эвазига амалга ошмайди. Бу ҳақда Кремлга яқин манбага таяниб, “Reuters” хабар берди.

Нашрнинг уч нафар россиялик манбасига кўра, Путин Ғарб давлатларидан ёзма кафолат олишни истамоқда – хусусан, НАТО шарққа кенгайтмаслиги ҳақида. Бу дегани, Украина, Грузия, Молдова ва бошқа собиқ СССР республикаларининг НАТОга аъзолиги қатъий равишда истисно қилиниши лозим.

Россия томони тинчлик битими шартлари сифатида қуйидагиларни илгари сурмоқда:

• Украинанинг нейтрал мақомини тан олиши;
• Россияга нисбатан баъзи санкцияларнинг бекор қилиниши;
• Россиянинг музлатилган активлари бўйича масаланинг ҳал этилиши;
• Украина ҳудудидаги рус тилида сўзлашувчи аҳолининг ҳуқуқларини ҳимоя қилиш.

Қолверса, Россия Ташқи ишлар вазири Сергей Лавров Хавфсизлик масалалари бўйича ўтаётган ХIII халқаро учрашувда Украина томонидан нейтрал, ҳарбий блокларга қўшилмайдиган ва ядро қуролидан холи мақомни қайта тиклашни Россиянинг асосий талабларидан бири сифатида қайд этган. Лавров, шунингдек, Қрим, Донецк, Луганск, Херсон ва Запорожье ҳудудларининг Россияга тегишли эканлигини халқаро тан олиниши муҳим шарт эканини айтган. У Украинанинг НАТОга қўшилмаслиги, 1990 йилги Давлат суверенитети тўғрисидаги декларацияга мувофиқ нейтрал мақомини тасдиқлаши, “неонацистик режим” оқибатларини бартараф этиши ва озчилик миллатларнинг ҳуқуқларини тиклаши кераклигини ҳам таъкидлаган.

Эслатиб ўтамиз, кеча, 27 май куни Трампнинг Украина бўйича махсус вакили Кит Келлогг “Fox News” телеканалига берган интервьюсида АҚШ Украинанинг бўлажак ўт очишни тўхтатиш бўйича таклифларини олгани ҳақида гапирганди. Келлоггнинг тушунтиришича, меморандум деганда у Москва ва Киев принципиал жиҳатдан муҳим деб биладиган муайян мақсад ва шартларни назарда тутади, кейинги вазифа уларни яраштиришга ҳаракат қилиш, шундан сўнг музокараларнинг навбатдаги босқичи ўтказилиши мумкин.