Германия канцлери Исроилнинг Ғазодаги ҳужумларини танқид қилди

Кеча, 26 май куни Германия канцлери Фридрих Мерц Исроилнинг Ғазо секторидаги ҳарбий амалиётларини танқид остига олди. Бу ҳақда у Берлиндаги Europaforum тадбирида сўз очди.

Унга кўра, Исроил ҳукумати ҳатто энг яқин дўстлари ҳам ташлаб кетишига тайёргарлик кўриши керак.

“Ростини айтсам, ҳозир мен Исроил армиясининг Ғазо секторида қандай мақсад кўзлаётганини тушунмаяпман”, деган Германия канцлери.

У, шунингдек, тинч аҳоли сўнгги кунларда тобора ортиб бораётган даражада азоб чекаётганини қайд этиб, бу ҳолатни ҲАМАСга қарши кураш билан оқлаб бўлмаслигини айтган.

Мерцнинг сўзларига кўра, Германия тарихий сабаблар борлиги боис Исроилга нисбатан жамоат олдида танқид билдиришда ҳар қандай давлатдан эҳтиёткорроқ бўлиши керак.

“Аммо халқаро гуманитар ҳуқуқ бузилаётган бўлса, Германия канцлери жим турмаслиги керак. Савол шундаки, ҳозир танқидни қай даражада аниқ ифодалаш керак – бу ерда мен тарихий сабабларга кўра эҳтиёткор бўлишни истайман”, дея изоҳ берган Фридрих Мерц.

Маълумот учун, Исроил 18 май куни икки ойлик тинчликдан сўнг, Ғазо секторида ҳарбий ҳаракатларни қайта бошлади. Халқаро кузатувчилар Исроил Мудофаа кучларининг амалиётларини танқид қилиб, бу ҳаракатлар тинч аҳолига катта зарар етказаётганини таъкидламоқда. Хусусан, март ойидан бошлаб Ғазога гуманитар ёрдам етказилишининг тўсиб қўйилиши ва фақатгина 19 майдан бошлаб қисман рухсат этилиши аҳоли ҳолатини янада оғирлаштирди.

Эслатиб ўтамиз, Фридрих Мерц жорий йилнинг 14 май куни Берлинда БМТ Бош котиби Антониу Гутерриш билан бўлиб ўтган учрашувда Исроил Бош вазири Биньямин Нетаньяху, Халқаро жиноий суд (ХЖС) томонидан ҳибсга олишга ордер чиқарилганига қарамай, Германияга ташриф буюриши мумкинлиги ҳақида гапирганди. Канцлернинг аниқлик киритишича, Нетаньяхунинг Германияга ташрифи ҳозирча режалаштирилмаган.