Кремль Трампнинг “Путин ақлдан озган” деган гапига жавоб қайтарди

Аввалроқ, АҚШ Президенти Дональд Трамп Россия Президенти Владимир Путинни кескин танқид қилиб, уни “буткул ақлдан озган” деб атаганди. Россия Президентининг матбуот котиби Дмитрий Песков Трампнинг бу баёнотини Россия ва Украина ўртасидаги музокараларга ёрдам бериши оқибатидаги “эмоционал зўриқиш” билан изоҳлади.

“Вашингтон музокараларни бошлаш учун жуда катта куч сарфлади. Бу эса, табиийки, эмоционал зўриқишга олиб келади”, деди Песков.

Шу тарзда у Дональд Трампнинг Путиннинг Украинадаги ҳаракатларидан норозилигига муносабат билдирди.

“Албатта, музокаралар жараёнининг бошланиши – бу америкаликлар ва шахсан Президент Трамп томонидан кўрсатилган катта саъй-ҳаракатлар натижаси бўлиб, жуда муҳим ютуқдир. Биз америкаликларга ва шахсан Трампга музокара жараёнини ташкиллаштириш ва ишга туширишдаги кўмаги учун миннатдорлик билдирамиз. Бу жуда масъулиятли дақиқадир, у ҳаммани эмоционал муносабатга ундайди. Биз барча реакцияларни диққат билан кузатиб борамиз”, деди Песков.

Шунингдек, Песковнинг таъкидлашича, Путин Россиянинг хавфсизлигини таъминлаш учун зарур бўлган қарорларни қабул қилмоқда. 

Эслатиб ўтамиз, Трамп 19 май куни Путин билан телефон орқали суҳбатлашганини ва можаро бўйича муросага эришиш имкониятини кўраётганини айтган эди. Унга кўра, санкциялар жорий этилса, вазият янада ёмонлашиши мумкин. Шунга қарамай, у “балки келажакда санкциялар вақти келар” деб истисно этмаганди.