Дунёда очлик сабаб 300 млн киши ўлим ёқасида турибди

Бутун дунё бўйлаб озиқ-овқат танқислиги хавотирли даражада ортиб бормоқда. Деярли 300 миллион киши очликдан нобуд бўлиш хавфи остида қолган. Бу ҳақда “The Guardian” нашри хабар берди.

Нашрнинг ёзишича, қуролли можароларнинг кескинлашуви, гуманитар ёрдам ҳажмининг қисқариши, иқлим ва иқтисодий инқирозлар оқибатида ўтган йили 13,7 миллион киши доимий озиқ-овқат танқислигига дуч келган.

Сўнгги глобал озиқ-овқат инқирози бўйича ҳисоботга кўра, кетма-кет олтинчи йилдирки, “ўта даражадаги озиқ-овқат танқислиги”га дуч келаётган инсонлар сони ортиб бормоқда. 2024 йил якунида бу кўрсаткич 295,3 миллион кишига етган. Бу рақам экспертлар ўрганиб чиққан 53 давлат аҳолиси сонининг қарийб 22,6 фоизини ташкил қилади.

Ушбу кўрсаткичдаги аҳолининг 95 фоиздан ортиғи Ғазо сектори ёки Суданда истиқомат қилади. Шунингдек, Гаити, Мали ва Жанубий Суданда ҳам озиқ-овқат танқислиги шиддат билан кучайган.

Ғазо секторидаги вазият айниқса оғир. Ўтган йили экспертлар минтақа аҳолисининг ярми очликка юз тутиши мумкинлигидан огоҳлантирган. Бу асосан уруш ва қуролли қарама-қаршиликлар билан боғлиқ. Шунга ўхшаш инқироз ҳолати Мьянма, Нигерия ва Конго Демократик Республикасида ҳам кузатилмоқда.

Эслатиб ўтамиз, аввалроқ Исроилнинг қамали туфайли Ғазода беш ёшгача бўлган болаларнинг 290 мингга яқини ўлим ёқасида қолаётгани хабар қилинган эди.