ҲАМАС бугуноқ гаровдаги америкаликни қўйиб юбориши мумкин

Фаластиннинг ҲАМАС ҳаракати АҚШ фуқароси бўлган исроиллик гаровга олинган шахсни озод қилишини тасдиқлади. Тегишли баёнот кеча, 11 май куни ҳаракатнинг ижтимоий тармоқдаги саҳифаларида эълон қилинди.

“ҲАМАС сўнгги бир неча кун ичида АҚШ маъмурияти билан музокаралар олиб борди ва маслаҳатлашувлар натижасида ижобий муносабат кўрсатиш ва икки фуқароликка эга бўлган исроиллик гаровга олинган Эден Александрни озод қилишга қарор қилди”, дейилади хабарда.

Шу билан бирга, ҳаракат маҳбуснинг озод этилиши “Ғазо секторида ўт очишни тўхтатиш бўйича кўрилаётган чора-тадбирларнинг бир қисми”, жумладан, анклав билан чегарадаги “барча назорат-ўтказиш пунктларини очиш” ва инсонпарварлик ёрдамини олиб кириши кераклигини таъкидлади.

ҲАМАС гаровга олинган шахс қачон озод этилиши мумкинлиги ҳақида аниқ маълумот бермади, бироқ ҳаракат Ғазо бўйича “зудлик билан интенсив музокараларни бошлашга” тайёр эканини ва “Ғазодаги жангларни тўхтатиш ва исроиллик гаровга олинганларни фаластинлик маҳбусларга алмашиш бўйича келишувга эришиш учун жиддий саъй-ҳаракатларни амалга оширишга” эътибор қаратди.

“The Times of Israel”нинг музокаралар жараёнида иштирок этган манбага таяниб ёзишича, Эден Александр бугун, 12 май куниёқ озод этилиши мумкин.

Бундан олдин, нашр манбасининг қайд этишича, Исроил томонида бир қатор чора-тадбирлар кўрилиши керак, жумладан, Ғазо секторининг бир қатор ҳудудларида гаровга олинганларни қутқариш бўйича аввалги операцияларда бўлгани каби, ҳарбий амалиётлар ва дронлар ёрдамида ҳаводан кузатув тўхтатилиши керак.

Ўз навбатида, “The Jerusalem Post” газетасининг ёзишича, гаровга олинган исроиллик-америкалик “яқин 48 соат ичида” озод этилиши керак.

Ҳаракат 15 апрель куни Эден Александрнинг ҳибсхонаси исроилликларнинг бомбардимонига учрагани ва уни қўриқлаётган ҲАМАС аскарлари билан алоқа узилганини маълум қилганди. Унинг аҳволи ҳақида бошқа расмий маълумотлар йўқ.

29 апрель куни ҲАМАСга яқин бўлган “Maan” агентлиги Ғазо бўйича билвосита музокараларда май ойида исроиллик гаровга олинганларни, жумладан Эден Александрни озод қилиш бўйича келишувга эришилганини хабар қилди.