Қатар Трампга 400 млн долларлик “учар сарой” совға қилади – ОАВ

АҚШ Президенти Дональд Трамп маъмурияти Қатар қироллик оиласидан қиймати 400 миллион долларга тенг бўлган Boeing 747-8 русумидаги суперҳашаматли реактив самолётни қабул қилишга тайёрланмоқда. Бу ҳақда ўз манбаларига таяниб, ABC News хабар берди.

Нашрнинг ёзишича, бу совға АҚШ тарихида хорижий давлатдан олинган энг қиммат ҳадя бўлиши мумкин.

“Президент бу самолётни лавозимида бўлган вақтида ўзининг янги Air Force One борти сифатида ишлатиши мумкин бўлади. Шундан сўнг у Трампнинг Президентлик фонди тасарруфига ўтади”, дейди манбалар.

Маълум қилинишича, ушбу совғанинг эълон қилиниши Трампнинг иккинчи президентлик муддатидаги илк хорижий сафари чоғида Қатарда бўладиган вақтига тўғри келиши керак эди. Бироқ Оқ уй юқори мартабали расмийсининг айтишича, совға Трамп Қатар ҳудудида бўлган пайтда расмий равишда топширилмайди. Трамп самолётни жорий йилнинг февраль ойидаёқ Флоридадаги аэропортда кўздан кечирган.

“Бу самолёт шунчалик дабдабали жиҳозланганки, уни “учар сарой” деб аташмоқда”, дейилади хабарда.

ABC News’нинг хабар беришича, Оқ уй ва АҚШ Адлия вазирлиги ҳуқуқшунослари АҚШ Мудофаа вазири Пит Ҳегсетга таҳлил ҳужжатини тақдим этган. Унда Пентагоннинг ушбу самолётни совға сифатида қабул қилиши ва кейинчалик уни Трамп фондига топшириши қонуний эканини, бу эса коррупцияга қарши қонунлар ёки АҚШ Конституциясининг эмолументлар бандини (бирон қирол, шаҳзода ёки хорижий давлатдан совғаларни қабул қилиш ҳақидаги тақиқ) бузмаслигини таъкидланган. Худди шундай хулосага АҚШ Бош прокурори ҳамда Трампнинг бош юристи ҳам келгани билдирилган.

Оқ уй матбуот котиби Кэролайн Ливитт нашрга изоҳ берар экан, “хорижий давлат томонидан берилган ҳар қандай совға барча қонунларга тўлиқ мувофиқ ҳолда қабул қилинади”, дея жавоб берган.

“Президент Трамп маъмурияти тўлиқ ошкораликка содиқдир”, дея қўшимча қилган Ливитт.

Авиация соҳаси мутахассисларига кўра, Трампга совға қилинадиган самолётнинг қиймати тахминан 400 миллион долларни ташкил қилади. Бу рақам эса унга зарур хавфсизлик ва алоқа тизимлари ўрнатилишидан олдинги баҳо. 

Маълумот учун, Дональд Трамп 13-16 май кунлари Яқин Шарққа сафар уюштириши кутилмоқда. Сафар доирасида у Саудия Арабистони, Қатар ва Бирлашган Араб Амирликларига ташриф буюради. “Axios”га кўра, Трамп Саудия Арабистонида бир қатор давлат раҳбарлари билан учрашув ўтказишни режалаштирмоқда.

Ушбу тадбир Саудия Арабистони валиаҳд шаҳзодаси ва Бош вазири Муҳаммад бин Салмон Ол Сауднинг таклифи билан бўлиб ўтади. Учрашувда Форс кўрфази араб давлатлари ҳамкорлик кенгашига аъзо мамлакатлар, яъни Саудия Арабистони, Баҳрайн, Қатар, Қувайт, БАА ва Уммон етакчилари иштирок этиши мумкин. Мазкур учрашув 14 май куни ўтказилиши кутилмоқда.