Украина тўлиқ ўт очишни тўхтатишга тайёр – Зеленский

Украина Президенти Владимир Зеленский Киев ўт очишни тўхтатишга тайёрлигини айтди. Бу ҳақда давлат раҳбари ўзининг Telegram-каналида ёзди.

“Украина етарли муддатга тўлиқ ва сўзсиз ўт очишни тўхтатишга тайёр, бу тинчликка биринчи қадам бўлиши керак. Бу борада бизни қўллаб-қувватлаган барчага миннатдорлик билдирамиз”, деб ёзган Зеленский.

Украина раҳбарининг сўзларига кўра, у яқинда Люксембург Ташқи ишлар вазири Ксаве Беттель ва мамлакат Мудофаа вазири Юрико Баcкес билан учрашган. Зеленский Киевга ҳарбий ёрдам кўрсатгани ва энергетика соҳасини қўллаб-қувватлагани учун уларга миннатдорлик билдирган. Томонлар, шунингдек, мустаҳкам тинчликка эришиш учун дипломатик саъй-ҳаракатларни муҳокама қилган.

Бундан ташқари, Украина президенти Киевнинг иттифоқчиларини “Москва музокаралар столига ўтириши учун Россияга босимни кучайтиришга” чақирди.

Унинг сўзларига кўра, Россия “50 кундан ортиқ вақт давомида Американинг ўт очишни тўхтатиш ҳақидаги таклифини эътиборсиз қолдирган ва Украинанинг тегишли ташаббусларини рад этган”.

“Шунинг учун дипломатик саъй-ҳаракатларни кучайтириш керак – биз Россияга оғзини ёпиш ва музокара бошлаш учун босим ўтказишда давом этишимиз керак. Санкциялар қанчалик самарали бўлса, Россия урушни тугатиш учун шунчалик кўп рағбатларга эга бўлади”, деди Зеленский.

Эслатиб ўтамиз, олдинроқ АҚШ Президенти Дональд Трампнинг махсус вакили Кит Келлогг “Fox News” телеканалига берган интервьюсида АҚШ Украинага можаронинг тугатилиши бўйича 22 та аниқ шартни тақдим этгани ва Киев уларни қабул қилганини, Украина Россия томонидан амалда назорат қилинаётган ҳудудлардан воз кечишга тайёр экани, бироқ бу юридик жиҳатдан тан олинмаслигини айтганди. 

Трампнинг ўзи эса 29 апрель куни ABC News телеканалига берган интервьюсида Россия Президенти Владимир Путин давом этаётган ҳужумларга қарамай, Украинадаги урушни тўхтатмоқчи эканини, Путин уни ҳурмат қилгани учун бутун Украинани эгалламаганини айтди. Франция Президенти Эммануэль Макрон эса “Paris Match” нашрига берган интервьюсида яқин 8-10 кун ичида Франция ҳукумати Россияга босимни имкон даражада кучайтиришини маълум қилди.