“Қабристонда ҳам сигнал бераман”. Марҳум Жириновскийнинг паспорти сотилди

Россия Либерал-демократик партиясининг асосчиси Владимир Жириновскийнинг хорижга чиқиш паспорти Санкт-Петербургдаги кимошди савдосида 1,1 млн рублга (тахминан 13 минг доллар) сотилди. Бу ҳақда  Шимолий аукцион уйи сайтида хабар берилди.

Маълум қилинишича, ҳужжат аукционда 750-рақамли лот остида ўтказилган. Совет намунасидаги “загран” паспорт 1992 йил 19 октябрдан 1997 йил 19 октябргача бўлган муддатга берилган.

Лот бўйича “нархни сунъий ошириш ва спонтансавдоларни олдини олиш” учун 100 000 рубль миқдорида қайтариладиган гаров киритиш таклиф қилинган.

Бир неча рус нашрлари Жириновскийнинг 2008 йил март ойида президентлик сайловларидан кейин журналистларга берган интервьюсида айтган гапларини эсга олиб, “у қайтди” дея эслаган.

“Ҳатто қабристондан ҳам сизларга сигнал бераман”, деган эди ўшанда Жириновский.

Маълумот учун, Жириновский 2022 йил 6 апрелда узоқ давом этган касалликдан сўнг 75 ёшида вафот этганди.

Вафотидан уч йил ўтиб россияликларнинг Жириновскийга бўлган ишончи 6 фоизга ошиб, 66 фоизга етди. Тадқиқотчиларга кўра, бу кўрсаткич келажакда ҳам ошишда давом этади.

Сиёсатчи нафақат Либерал-демократик партиянинг асосчиси, балки “башоратчи” сифатида ҳам танилган. 2024 йил декабрь ойида Россия Президенти Владимир Путин Жириновский башоратчи эмас, балки “билимдон ва тайёргарлик кўрган одам” эканлигини таъкидлаган.