Оқ уй Трамп президентлигининг иккинчи 100 кунлиги учун режа тайёрлаяпти – “Reuters”

Келгуси ҳафта иккинчи муддатининг дастлабки 100 кунини нишонлайдиган АҚШ Президенти Дональд Трамп жамоаси яқин 100 кунлик режани ҳозирдан тайёрламоқда. Бу ҳақда Оқ уй расмийларига таяниб “Reuters” хабар берди.

Трамп келаси ҳафта Мичиган штатига 100 кунлик митинг учун ташриф буюришни режалаштирмоқда. Тадбир давомида Трамп жамоаси ўзининг иқтисодий қарашлари, ноқонуний муҳожирларга нисбатан радикал сиёсати, ташқи сиёсатдаги ўзгаришлар ва миллиардер Илон Маск бошчилигидаги Ҳукумат самарадорлиги департаменти (DOGE) ишини ёритиш ниятида.

Келгуси 100 кун ичида Трамп маъмурияти бир неча мамлакатлардан саёҳат қилишни тақиқлаш ва савдо битимлари ва тинчлик музокараларига урғу бериш бўйича саъй-ҳаракатларни кучайтиришни режалаштирмоқда.

Расмийлардан бири Трампнинг захирада яна бир нечта “сувости торпедалари” борлигини айтган, бироқ у нима ҳақида гапираётганини тушунтирмаган.

Агентликка кўра, Трампнинг режалари ҳақида эълон қилиниши унинг навбатдаги муддатини илгари суриш бўйича кенгроқ кампаниянинг бир қисми бўлади, Оқ уй мулозимларидан бири ўз исмини ошкор қилмаслик шарти билан буни “консерватив фантазия” деб таърифлаган.

“Трамп расмийлари унинг Америка жамиятини қайта қуриш ҳаракатлари тезлиги ва кўламини олқишласа-да, танқидчилар у фуқаролар ва фуқаролиги бўлмаганлар ҳуқуқларини оёқости қилган, иттифоқчиларни бегоналаштирган ва АҚШнинг дунёдаги ҳукмронлигига таҳдид солганини айтишади”, дейилади нашрда.

Журналистларнинг эслашича, 2025 йилнинг январида иккинчи марта Оқ уйда лавозимга киришганидан сўнг, Трамп “антисемитизм хатти-ҳаракатларига тоқат қилгани учун” баъзи университетларни ҳукумат томонидан молиялаштиришни тўхтатган, федерал ҳукумат ва федерал пудратчилар билан хилма-хиллик, тенглик ва инклюзия (DEI) дастурларини бекор қилган ва бошқа бир қатор қарорлар қабул қилган.

“Бу бутун АҚШ жамиятига сезиларли таъсир кўрсатди”, деб ёзади “Reuters”.

Оқ уй расмийларидан бири олдинда Трампнинг дастлабки 100 кунидаги жиддий ҳаракатлар яна кузатилишини айтган.

Эслатиб ўтамиз, аввалроқ АҚШ Президенти Дональд Трамп Россия раҳбари Владимир Путиннинг Украинадаги урушни тугатиш истагига шубҳа билдиргани хабар қилинганди.