Парижда митинг: Ле Пенни Трампга қиёслашди

Айни кунларда Франция пойтахти Париж шаҳрида бир неча минг намойишчи Францияда Европарламент маблағларини талон-торож қилгани учун судланган “Миллий митинг” партиясининг парламентдаги фракцияси раҳбари Марин Ле Пен иштирокида митинг ўтказмоқда. Бу ҳақда RT хабар берди.

Маълум қилинишича, йиғилганлар Ле Пенни 2027 йилги Франция президентлик сайловларида иштирок этиши суд томонидан тақиқланишига қарши чиққан.

Митинглар “Миллий митинг” ташаббуси билан ногиронлар саройи олдидаги майдонда бўлиб ўтган. Ташкилотчилар намойишда 10 минггача одам иштирок этишини кутишган. Бино олдидаги майдон тўлиқ тўлмаган. Намойишчиларга Марин Ле Пеннинг ўзи бошчилик қилган.

“Мен 30 йил давомида адолатсизликка қарши курашиб келдим. Ва мен курашни давом эттираман”, деган Ле Пен.

Йиғилганлар бир неча бор “Марин – президент!” ва “Улар биздан 2027 йилни ўғирламайди” деган шиорларни айтган.

Ле Пеннинг бир қатор тарафдорлари “Адолат буйруқларни бажаради” ва “Суд диктатураси тўхтатилсин”, деб ёзилган плакатларни олиб юрган. Бошқалар эса “Je suis Marine” (Мен Маринман) футболкаларини кийиб, Ле Пенни судланган ва шунга қарамай иккинчи марта олий давлат лавозимини эгаллашга муваффақ бўлган АҚШ Президенти Дональд Трамп билан таққослаган.

“Миллий митинг” партияси раҳбари, 29 ёшли Жордан Барделла Париж судининг қарори Ле Пенни президентлик пойгасидан “четлатиш”га қаратилганига ишонч билдирган.

Марин Ле Пенга чиқарилган ҳукм

“Миллий митинг” партияси парламент гуруҳи раҳбари Марин Ле Пен, партиядан 8 депутат ва 12 депутат ёрдамчиси қонун чиқарувчи орган маблағларини ўзлаштирганликда айбдор деб топилди. Бу қарор Парижнинг ахлоқ тузатиш маҳкамаси томонидан кеча, 31 март куни қабул қилинган. Ле Пен тўрт йиллик қамоқ жазосига ҳукм қилинган, шулардан икки йили шартли равишда муддатидан илгари бекор қилинган ва у яна икки йил давомида электрон билагузук тақишга мажбур бўлади.

Бундан ташқари, унга беш йилга давлат лавозимларида ишлаш тақиқланган. Бироқ судьялар ҳайъати сиёсатчининг апелляция шикояти бўлишидан қатъи назар, тақиқ дарҳол кучга кириши ҳақида қарор чиқарди, бу Франциядаги стандарт суд амалиётига тўғри келмайди.

Ишда жами 27 киши, жумладан, Миллий иттифоқ раҳбарияти ҳам иштирок этган. Сиёсатчилар Европа Иттифоқи маблағларини суиистеъмол қилганликда ва Европарламент депутатлари ёрдамчиларини сохта ёллаш орқали партияни яширинча молиялаштирганликда айбланган.

Ҳукмдан кейин Италия Бош вазири ўринбосари Маттео Сальвини, Венгрия Бош вазири Виктор Орбан ва Нидерландиядаги ҳукмрон коалиция таркибига кирувчи ўнг қанот “Озодлик” партияси раҳбари Герт Вилдерс Марин Ле Пенни қўллаб-қувватлашини билдирган.

Эслатиб ўтамиз, аввалроқ АҚШ Президенти Дональд Трамп Франциянинг “Миллий митинг” партияси парламентдаги фракцияси етакчиси Марин Ле Пенга чиқарилган суд ҳукмини жодугар овига мисол деб атаган ва уни озод қилишга чақирганди.