Кореяликлар Юннинг давомчисини сайлайди

Жанубий Кореяда 3 июнь куни ҳокимиятдан четлатилган собиқ президент Юн Сок Ёлнинг ворисини аниқлаш учун янги президентлик сайловлари бўлиб ўтади. Бу ҳақда ҳукуматдаги манбаларга таяниб, Жанубий Кореянинг “Yonhap” ахборот агентлиги хабар берди.

Қайд этилишича, мазкур сана президент вазифасини бажарувчи бош вазир Хан Док Су раислигидаги Вазирлар Маҳкамаси йиғилишида тасдиқланиши кутилмоқда.

Конституциявий суд импичмент тўғрисидаги қароридан сўнг, мамлакатда 60 кун ичида муддатидан олдин президентлик сайловлари ўтказилиши керак. Агар сана тасдиқланса, сайлов тақвимига кўра, номзодлар 11 майдан кечиктирмай ариза топширишлари керак, сайлов кампанияси эса 12 майда бошланади. 3 июнь куни бўлиб ўтадиган сайловлардан сўнг янги президент ўз лавозимига киришади. 

Юннинг ҳарбий ҳолат эълон қилиши ва импичмент жараёни 

Ўша пайтдаги президент Юн Сок Ёль 2024 йил 3 декабрда “мухолифатнинг давлатга қарши ҳаракатларга аралашгани”ни баҳона қилиб, ҳарбий ҳолат эълон қилган эди.

Бироқ бу қарор парламентдаги овоз бериш орқали бекор қилинди ва Вазирлар Маҳкамаси томонидан маъқуллангач, у ўз фикридан қайтишга мажбур бўлди.

2024 йил 14 декабрда Миллий ассамблея Конституциявий суднинг иши бўйича қарори қабул қилинмагунча лавозимидан вақтинчалик четлатилган Юнга импичмент эълон қилиш учун овоз берди.

Суд жараёнидан сўнг Конституциявий суд 4 апрель куни Миллий ассамблеянинг импичмент ҳақидаги сўровини қаноатлантирган ва ҳарбий ҳолат туфайли Юнни лавозимидан четлаштириш тўғрисида қарор чиқарган.