Россия Зеленскийнинг она шаҳрига зарба берди. 18 киши ҳалок бўлди

Кеча, 4 апрель куни Россиянинг Украина Президенти Владимир Зеленский туғилиб ўсган шаҳар – Кривой Рогга уюштирган ракета ҳужуми оқибатида камида 18 киши ҳалок бўлди. Улар орасида тўққиз нафар бола ҳам бор. Шунингдек, ҳужум оқибатида 50 дан ортиқ киши жароҳат олган. Бу ҳақда UNIAN хабар берди.

Владимир Зеленский мазкур ҳужумдан сўнг ҳалок бўлган ва ярадорларнинг оилаларига ҳамдардлик билдирган.

“Кўплаб жабрланганлар бор, уйлар зарарланган. Ракеталар аслида турар жой бинолари ёнидаги ҳудудга тушган – болалар майдончаси, оддий кўчалар”, деган Зеленский.

Зеленский, шунингдек, Россия 5 апрель куни Херсондаги электр станциясига ҳам дрон ёрдамида ҳужум қилганини билдирган.

Россия Мудофаа вазирлиги эса ўзининг Telegram’даги баёнотида ҳужум Украина ва Ғарб офицерлари учрашувига қаратилганини билдирган. Баёнотда айтилишича, бу аниқ нишонга қаратилган ўта кучли портловчи жанговар ракета билан Кривой Рог шаҳридаги бўлинмалар қўмондонлари ва ғарбий инструкторлар учрашуви бўлиб ўтган ресторанга қилинган зарба бўлган.

“Зарба оқибатида душман 85 нафар ҳарбий ва хорижий офицерларини ҳамда 20 тагача техникани йўқотди”, дейилади вазирлик хабарида.

Украина Бош штаби эса россияликларнинг Кривой Рогдаги “ҳарбий йиғилиш ўтказилган жойга” қилинган “аниқ зарба” ҳақидаги гапларини “ўта аниқ ёлғон” деб атаган.

Эслатиб ўтамиз, аввалроқ Россия армияси Украинанинг йирик шаҳарлари – Харьков, Днепр ва Киевга дронлар билан зарба берганди. Ҳужум оқибатида тўрт киши ҳалок бўлган, яна 35 киши тан жароҳати олган.