Зеленский Оқ уйдаги жанжалдан сўнг Макрон ва Рютте билан гаплашди

north_east

АҚШ Украинага ҳарбий ёрдамни тўхтатишни кўриб чиқмоқда

Украина Президенти Владимир Зеленский Оқ уйда америкалик етакчиси Дональд Трамп билан мунозарадан сўнг, Франция Президенти Эммануэль Макрон ва НАТО Бош котиби Марк Рютте билан қўнғироқлашди. Бу ҳақда “Financial Times” журналисти Кристофер Миллер Украина етакчиси атрофидаги манбаларига таяниб хабар берди.

Зеленский ва Макрон телефонда айнан нимани муҳокама қилгани номаълумлигича қолган. Бироқ журналистнинг қўшимча қилишича, уларнинг суҳбатидан сўнг Украина Президенти НАТО Бош котиби Марк Рюттега ҳам қўнғироқ қилган. Бу суҳбатнинг мазмуни ҳам номаълумлигича қолган.

“Президент Зеленский ҳозиргина Франция Президенти Макрон билан телефонда гаплашди ва ҳозир НАТО Бош котиби Рютте билан алоқада, деди менга Украина етакчисига яқин одам”, деб ёзди журналист.

Оқ уйдаги жанжал

Кеча, 28 февраль куни Владимир Зеленский ва Дональд Трамп Оқ уйда учрашди. Икки лидер АҚШ ва Украина ўртасида фойдали қазилмалар бўйича келишув имзолаши кутилган эди. Бироқ учрашув қизғин оҳангда бўлиб ўтди.

Учрашув давомида Трамп Зеленскийни бир неча бор ношукурликда айблаган.

Учрашувдан сўнг, Зеленский Америкага кўрсатган ёрдами учун миннатдорлик билдирди ва “Украинага адолатли ва мустаҳкам тинчлик керак ва биз айнан шу мақсадда ҳаракат қиляпмиз”, деб айтди.

Кўплаб европалик сиёсатчилар, жумладан Эммануэль Макрон Трамп билан бўлган жанжалдан кейин Украина раҳбарини қўллаб-қувватлади.

“Агрессор – Россия. Агрессия қурбони эса Украина. Биз ёрдам берганларга раҳмат айтишимиз керак, лекин бошиданоқ курашганларни ҳурмат қилишимиз керак”, деган Франция Президенти.