Дунёнинг энг машҳур нашрларидан бири Трамп маъмуриятини судга берди

Энг йирик халқаро ахборот агентликларидан бири бўлган “Associated Press” АҚШ Президенти Дональд Трамп маъмуриятининг уч нафар мансабдор шахсига агентликнинг давлат раҳбари иштирокидаги тадбирларга киришини чеклагани учун судга мурожаат қилди. Бу ҳақда агентликнинг ўзи хабар берди.

Шикоят Вашингтондаги АҚШ округ судига топширилди. Трамп аллақачон тақиқни узайтириш билан таҳдид қилганига қарамай, шикоятда федерал судьядан журналистларнинг президентлик тадбирларига киришига 10 кунлик тақиқни бекор қилиш сўралган. Хусусан, унда AP Овал кабинетига ва Президент самолёти Air Force One'га киришнинг рад этилиши АҚШ конституциясига сўз ва матбуот эркинлигини кафолатловчи Биринчи тузатишнинг бузиши таъкидланган.

“Қўшма Штатлардаги матбуот ва барча одамлар ўз сўзларини танлаш ҳуқуқига эга ҳамда ҳукуматнинг қасосларига дучор бўлмайди. AP таҳририятининг мустақиллигига қаратилган ушбу мақсадли ҳужум Биринчи тузатишнинг ўзагига зарба беради”, дейилади унда.

Оқ уй раҳбарининг бу қарори таҳририят Трампнинг тегишли фармонига қарамай, ўз материалларида Мексика кўрфазининг номини “Америка кўрфази” деб ўзгартиришдан бош тортгани муносабати билан қабул қилинган.

Агентлик томонидан судга арз қилинган “айбланувчилар” – Оқ уй аппарати раҳбари Сьюзан Уайлс, унинг ўринбосари Тейлор Будович ва Оқ уй матбуот котиби Кэролайн Ливиттдир.

Маълумот учун, “Associated Press” дунёдаги энг йирик ва энг қадимги ахборот агентликларидан бири бўлиб, 1846 йилда Нью-Йоркда ташкил этилган. У Америка нашрларига тегишли нотижорат кооператив сифатида ишлайди. Бугунги кунда агентликда бутун дунё бўйлаб 3 мингдан ортиқ киши ишлайди.

Эслатиб ўтамиз, жорий йилнинг январь ойида АҚШ Президенти Дональд Трампнинг туғилганлик ҳуқуқи асосида фуқаролик беришни чеклаш ҳақидаги фармонига қарши 22 штат судга мурожаат қилганди. Февраль ойида эса АҚШнинг 14 штати вакиллари Трамп ва Ҳукумат самарадорлиги департаменти раҳбари Илон Маскни судга берганди.