Тошкентда пистолет ва жанговар патронлар сақлаган шахс ушланди

Давлат хавфсизлик хизмати ҳамда Ички ишлар вазирлиги тузилмалари томонидан жорий йилнинг 5-7 февраль кунлари Тошкент шаҳрида ўтказилган “Ориат” ва “Қорадори” кенг кўламли тадбирларида “Макаров” пистолетини сақлаб келган шахс аниқланди. Бу ҳақда Давлат хавфсизлик хизмати матбуот хизмати хабар берди.

Тезкор-қидирув тадбирлари давомида 1980 йилда туғилган шахс Учтепа туманида 1987 йилда туғилган фуқарога таҳдид қилиб, унинг юз соҳасига бир неча маротаба ургани ва нархи 280 АҚШ доллари бўлган қўл телефони ҳамда 460 минг сўм пулларини қўлга киритиб, воқеа жойидан яширингани аниқланган. Унга нисбатан жиноят иши қўзғатилиб, қамоқ эҳтиёт чораси қўлланган.

Шунингдек, ушбу шахснинг таниши ўзининг яшаш манзилида “Макаров” пистолетини сақлаб келаётгани ҳақида тезкор маълумот олинган. 6 февраль куни 1978 йилда туғилган мазкур шахс ушланиб, унинг Учтепа туманидаги уйида ўтказилган тинтув давомида, 1980 йилда ишлаб чиқарилган 1 дона “Макаров” пистолети, 2 дона ўқдон ва 15 та жанговар патронлар аниқланиб, тегишли тартибда ҳужжатлаштириб олинган.

Эслатиб ўтамиз, аввалроқ Тошкент халқаро аэропортида Ўзбекистонга ўқотар қурол олиб кирмоқчи бўлган шахс қўлга олинганди. У халқаро аэропортга “Екатеринбург-Тошкент” йўналиши бўйича учиб келган. Унинг 1 дона яшил рангли йўл сумкаси тегишли тартибда текширилганда сумка ичида божхона назоратига белгиланган тартибда тақдим этилмаган, оғзаки сўровда маълум қилинмаган, ички ишлар органларининг тегишли рухсатномаларига эга бўлмаган 1 дона “Stalker” пневматик тўппонча ҳамда 860 дона ўқ борлиги аниқланган.