Украина Курскдаги 92 та аҳоли пунктини назорат қиляпти – Зеленский 

Украина Қуролли кучлари Россия Федерациясининг Курск вилоятидаги 1250 квадрат километрдан ортиқ ҳудуд ва 92 аҳоли пунктини назорат қиляпти. Бу ҳақда Украина Президенти Владимир Зеленский кеча, 9 август куни Украинанинг хорижий дипломатик муассасалари раҳбарлари билан учрашувда маълум қилди.

Унинг сўзларига кўра, Украина Қуролли кучлари “бир операцияда энг кўп россиялик асирларни олган” ва “Украина учун айирбошлаш фондини тўлдириш” давом этмоқда.

“Россия Федерацияси қуролли кучлари асосан бизнинг Суми вилоятига қарама-қарши бўлган Россия чегарасидан сиқиб чиқарилди”, дейди Зеленский.

Украина раҳбарининг таъкидлашича, бир неча ой олдин дунёда кўпчилик Курск ҳужумини нореал ва “Россияда мавжуд бўлган барча қизил чизиқлардан энг қизил чизиқларини кесиб ўтиш” деб ҳисоблаган бўларди.

“Шунинг учун, аслида, бизнинг тайёргарлигимиз ҳақида ҳеч ким эшитмаган. Фаол профилактик мудофаа – бу Россия террорига қарши энг самарали курашдир. Россияга нисбатан “қизил чизиқлар” деб аталадиган содда, хаёлий концепция бир куни Суджа яқинида қулаб тушди”, дейди Украина раҳбари.

Зеленский агар Украина ҳамкорлари Россия Федерацияси ҳудудида қурол қўллаш бўйича барча чекловларни олиб ташласа, Киев Курск вилоятида ҳужум уюштириши шарт эмаслигини айтди. Украина давлати раҳбари Россия ҳарбий базалари, аэродромлар, логистика ва бошқа ҳарбий объектлар Украина Қуролли кучлари учун “мутлақо адолатли нишон” эканлиги ҳақида фикр билдирди.

Шунингдек, Украина Президенти Москвага қарши “санкция қалқони”ни кенгайтириш зарурлигига ишонч билдирди, бу Россия Федерациясининг ҳарбий фаоллигини таъминлайдиган янги ҳудудларда чекловларни қабул қилишни ўз ичига олади. Украина раҳбари эътиборни “соя танкерлари флоти”, Москванинг Теҳрон ва Пхеньян билан ҳамкорлигига, Россия атом саноати ва Россия банк секторининг глобал тузилмалар билан алоқасига қаратди.

Бундан ташқари, Зеленский иттифоқчиларнинг мамлакат ҳарбий-саноат комплексига маблағ киритиши зарурлигини таъкидлади.

“Биз давлат институтларимизни модернизация қилишимиз керак, шунда улар барча украиналикларни Украина атрофида бирлаштиришдек замонавий вазифага жавоб беради”, дея қўшимча қилди у.

Маълумот учун, 6 август куни Украина Қуролли кучлари Курск вилоятида кенг кўламли ҳужум операциясини бошлади. Иккинчи жаҳон уруши тугаганидан кейин биринчи марта хорижий қуролли кучлар Россия Федерацияси ҳудудининг бир қисмини эгаллаб олди. 9 август куни Россия ҳукумати Белгород, Брянск ва Курск вилоятларида “аксилтеррор операцияси режими”ни жорий қилди.

Эслатиб ўтамиз, аввалроқ Зеленский Украина Қуролли кучларининг Курск вилоятидаги ҳужумидан мақсад “босқинчи ҳудудида буфер зона яратиш” эканини айтганди.