Тожикистон Афғонистон билан чегарани мустаҳкамлаш дастурини имзоламоқчи

Тожикистон жорий йилнинг июль ойида Афғонистон билан чегарани мустаҳкамлаш бўйича Коллектив Хавфсизлик Шартномаси Ташкилотининг (КХШТ) дастурини имзолаш ташаббуси билан чиқишни таклиф қилмоқда. Бу ҳақда Республика ТИВ раҳбари Сирожиддин Мухриддин Олмаотада бўлиб ўтган КХШТ Ташқи ишлар вазирлари кенгаши йиғилишида маълум қилди. 

“Бугун Ташқи ишлар вазирлари кенгашининг қарори қабул қилиниши билан КХШТнинг тожик-афғон чегарасини мустаҳкамлаш бўйича мақсадли давлатлараро дастурини ишлаб чиқиш бўйича ўн бир йиллик музокаралар жараёни якунига етди. Тожикистон июль ойида мунтазам равишда КХШТ Коллектив хавфсизлик кенгашининг (давлат раҳбарлари) ушбу масала бўйича қарорини имзолаш ташаббуси билан чиқишни таклиф қилмоқда”, дейилади вазирлик баёнотида.

Жорий йилнинг февраль ойида бўлиб ўтган матбуот анжуманида Мухриддин дастурни 2023 йилда имзолаш режалаштирилгани, бироқ жараён 2024 йилга кўчирилганини айтган эди. Март ойида КХШТ Бош котиби Имангали Тасмагамбетов ОАВга берган интервьюсида дастур лойиҳаси КХШТ Доимий Кенгаши томонидан маъқуллангани ва Афғонистондан келаётган таҳдидлар кўламидан хабардор бўлган ташкилотнинг икки аъзоси – Қирғизистон ва Тожикистон раҳбариятининг сиёсий иродаси қайд этилганини айтган.