Жавоҳир Синдоров Магнус Карлсенга қарши ўйнади

Кеча, 7 сентябрь куни Ҳиндистоннинг Бангалор шаҳрида ўтказилаётган Tech Mahindra Global Chess League мусобақасининг учинчи босқичида норвегиялик собиқ жаҳон чемпиони Магнус Карлсен ва ўзбекистонлик Жавоҳир Синдоров ўзаро баҳс олиб борди.

Мазкур партия “Alpine APL Pipers” ва “FYERS American Gambits” жамоалари ўртасидаги учрашув доирасида биринчи тахтада ўтказилди. Томонлар муросага келиб, партия дуранг билан якунланди.

Якунда “Alpine APL Pipers” “FYERS American Gambits”ни 15:3 ҳисобида мағлуб этди. Шу натижа орқали Карлсен жамоаси 12 очкодан 9 тасини жамғариб, мусобақа пешқадамига чиқди.

“FYERS American Gambits” сафида иштирок этаётган қозоғистонлик шахматчи Бибисара Асаубаева эса ҳиндистонлик Дивья Дешмух билан дуранг ўйнади.

Умумий мукофот жамғармаси 1 миллион АҚШ долларини ташкил этувчи мусобақа жорий йилнинг 13 сентябрга қадар давом этади.

Эслатиб ўтамиз, аввалроқ ўзбекистонлик шахматчи Жавоҳир Синдоров мазкур турнирида Бибисора Ассаубаева билан бир жамоада иштирок этиши ҳақида хабар берилганди.