Зеленский Марказий Осиёдаги икки элчини ишдан ҳайдади

Украина Президенти Владимир Зеленский Валерий Жовтенкони Украинанинг Қирғизистон Республикасидаги ва Валерий Евдокимовни Тожикистондаги Фавқулодда ва мухтор элчиси лавозимидан озод этди. Украина Президенти тегишли фармонни кеча, 3 август куни имзолади.

Кадрлар алмашинувидаги асосий қарорларидан бири Украинанинг Бирлашган Миллатлар Ташкилотининг Таълим, фан ва маданият масалалари бўйича ташкилотидаги (UNESCO) вакиллигининг ўзгариши бўлди. Президент Вадим Омельченкони UNESCO ҳузуридаги доимий вакил лавозимидан озод этган. Аввалроқ, у ушбу вазифани Украинанинг Франциядаги Фавқулодда ва мухтор элчиси лавозими билан биргаликда олиб бораётган эди. 

Бўшаб қолган лавозимга Виктория Лялина-Бойко тайинланган. Доимий вакил мақомига ўтгунга қадар у Украина Ташқи ишлар вазирлигининг Жамоатчилик дипломатияси ва стратегик коммуникациялар департаментини бошқарган. 

Жиддий ўзгаришлар Европа ва Шимолий Африкадаги дипломатик миссияларга ҳам дахлдор бўлган. Украинанинг Австриядаги элчиси Василий Химинец лавозимидан озод этилган. Африка минтақасида кадрлар тозаланиши Тунисдаги элчи ва (ўриндошлик асосида) Ливиядаги элчи лавозимларини тарк этган Владимир Хоманецга ҳам дахл қилган.

Ишдан олинган дипломатлар рўйхатига Марказий Осиё ва Жануби-Шарқий Осиё мамлакатларидаги вакиллар ҳам кирган. Президент қуйидагиларни лавозимидан озод этиш тўғрисидаги фармонларни имзолаган:

• Валерий Евдокимов – Украинанинг Тожикистондаги элчиси;
• Валерий Жовтенко – Украинанинг Қирғизистондаги элчиси;
• Екатерина Зеленко – Сингапур ва Бруней-Доруссаламдаги элчи.

Ҳозирги вақтда Австрия, Тунис, Ливия, Тожикистон, Қирғизистон, Сингапур ва Брунейдаги дипломатик миссияларнинг янги раҳбарлари тайинлангани ҳақида маълумотлар йўқ. Расмий манбалар ҳозирча бунчалик кенг кўламли кадрлар алмашинуви сабабларига изоҳ бермаяпти.

Эслатиб ўтамиз, аввалроқ Владимир Зеленский мамлакат Миллий хавфсизлик ва мудофаа кенгаши котиби Рустам Умаровни Ташқи разведка хизмати раҳбари этиб тайинлаши ҳақида хабар берилган эди.