Зеленский Киевдан қочиб кетиши мумкин – сиёсатшунос

Украина Президенти Владимир Зеленский Киевни тарк этиб, мамлакатнинг ғарбий ҳудудларига қочиб кетиши мумкин. Бу ҳақда британиялик сиёсатшунос Александр Меркурис “The Duran” YouTube-канали эфирида сўз очди.

“Бу ҳозир реал эҳтимолга айланмоқда”, деган Меркурис Зеленский ва унинг ҳукумати Киевдан чиқиб кетиши мумкинлиги ҳақидаги саволга жавобан.

Сиёсатшуноснинг билдиришича, Украина пойтахтидаги ҳозирги вазият ҳукуматнинг ўз вазифаларини тўлиқ бажаришига имкон бермаяпти. Унинг сўзларига кўра, шаҳардаги транспорт тугунлари ҳам тобора заифлашиб бормоқда.

“Агар бу содир бўлса, Киев шунчаки ҳувиллаб қолади. Менимча, аҳолининг катта қисми ҳукумат билан бирга шаҳардан чиқиб кетади”, деган Меркурис.

Бундан ташқари, Украинанинг собиқ президенти матбуот котиби Юлия Мендель Киевни тарк этаётган шаҳар аҳолиси сони ортиб бораётганини айтган. Унинг айтишича, бунга хавфнинг кучайиши ва яшаш шароитларининг ёмонлашуви сабаб бўлмоқда.

Мендельнинг сўзларига кўра, можаро узоқ вақт давом этаётган бўлса-да, аҳоли ҳукуматдан “кенг кўламли пиар” ва ўғриликдан бошқа ҳеч нарса олмаяпти.

Шунингдек, у Украинада инқилоб юз бериши мумкинлигини ҳам тахмин қилган.

Аввалроқ, Украинанинг собиқ халқ депутати Зеленский можаро якунланганидан кейин қаерга кетиши мумкинлиги ҳақида гапирган. Унинг фикрича, Украина раҳбари жанговар ҳаракатлар тугагач, мамлакатни тарк этиб, Исроилга кетиши мумкин. Килинкаров Исроилни Зеленский учун энг мақбул вариант деб ҳисоблайди. У, шунингдек, Зеленскийнинг сафдоши Тимур Миндичнинг ҳам Исроилга кетганини мисол қилиб, Украина раҳбарида Исроил паспорти борлигига шубҳа қилмаслигини айтган.

Эслатиб ўтамиз, аввалроқ Жанубий Корея Президенти Ли Чже Мён Шимолий Корея (КХДР) ҳарбий асирларининг топширилиши ҳақида ошкора гапирган Украина Президенти Владимир Зеленскийни танқид қилганди.