Зеленский Испаниядан электр станцияларини таъмирлашда ёрдам сўради

Украина Президенти Владимир Зеленский мамлакатдаги барча электр станциялари у ёки бу даражада шикастланганини маълум қилди. У Испания ва Лотин Америкаси давлатларидан электр станцияларини таъмирлаш учун зарур ускуналар етказиб беришда ёрдам сўради. Бу ҳақда Зеленский 30-Иберо-Америка саммити иштирокчиларига йўллаган мурожаатида айтди.

Қайд этилишича, Украина трансформаторлар, кабеллар, замонавий электр ускуналари ҳамда дизель ва газ генераторларига муҳтож. Зеленский эса Лотин Америкаси давлатлари ва Испанияни бу ускуналарни зудлик билан етказиб беришга ёрдам беришга чақирган.

Унинг баёноти мамлакатда электр таъминоти билан боғлиқ вазият кескинлашган бир пайтда янграган. “Ukrinform” хабарига кўра, бугун, 6 ноябрь куни Киевда деярли тўлиқ электр узилиши кузатилган. Шаҳарнинг Днепр дарёсининг ўнг соҳилидаги айрим туманларида фавқулодда электр узилишлари жорий этилган.

Аввалроқ, 3 ноябрь куни Россия Мудофаа вазирлиги Украина ҳудудидаги энергетика инфратузилмаси объектларига зарба берилганини билдирган. Вазирлик маълумотига кўра, Винница, Днепропетровск ва Харьков вилоятларидаги, Украина ҳарбий-саноат мажмуаси корхоналари ҳамда Қуролли кучлари бўлинмаларини электр билан таъминлайдиган объектлар нишонга олинган. Жумладан, Ладижин, Кривой Рог, Днепр ва Харьков иссиқлик электр станциялари, шунингдек, Змиевская ва Лосево электр подстанцияларига зарба берилган.

Шу куни Киевдаги учта метро йўналиши ҳам техник сабабларга кўра фаолиятини тўхтатган. DTEK энергетика компанияси эса Киев, Киев ва Днепропетровск вилоятларида фавқулодда электр узилишлари бошланганини маълум қилган.

Киев мэри Виталий Кличко шаҳардаги электр таъминоти билан боғлиқ вазиятни ўта мураккаб деб баҳолаган. “Укрэнерго” авариявий ўчиришларни жорий этган, энергетиклар электр таъминотини тиклаш устида ишлаган.

Бундан ташқари, Россия Мудофаа вазирлиги бугун, 6 ноябрга ўтар кечаси Днепропетровск вилоятидаги электр подстанциясига ҳам зарба берилганини билдирган. Россия Мудофаа вазирлиги зарбалар фақат Украинанинг ҳарбий ва энергетика объектлари ҳамда улар билан боғлиқ инфратузилмага берилаётганини бир неча бор таъкидлаган.

Эслатиб ўтамиз, жорий йилнинг октябрь ойида Россия Украинани электрсиз қолдиришни режалаштираётгани ҳақида хабар берилган эди. Ўша вақтда Россия Мудофаа вазирлиги томонидан тузилган ҳужум режаси Украина расмийлари қўлига тушган эди. Ҳужжатга кўра, Россия Украина энергетика тизимига ракеталар, бошқариладиган авиабомбалар ва дронлар, жумладан, реактив дронлар ёрдамида уч босқичда ҳужум қилишни режалаштирган.

Шунингдек, Норвегия Украинага қиш мавсумида энергия таъминотини барқарор сақлаш ва Россия ҳужумлари оқибатида зарар кўрган энергетика инфратузилмасини тиклаш учун қарийб 54 миллион доллар ажратишини маълум қилган эди.